«Azamattyq bastamalardy qoldaý ortalyǵy» komersıalyq emes aksıonerlik qoǵamy QR Din isteri jáne azamattyq qoǵam mınıstrliginiń qoldaýymen azamattyq bastamalardy qoldaý, azamattyq qoǵam ınstıtýttarynyń áleýmettik damý salasynyń ózekti máselelerin sheshý úshin áleýetin kóterý maqsatynda úkimettik emes uıymdarǵa arnalǵan memlekettik granttardy taǵaıyndaýǵa baıqaý jarıalady, dep jazady Qamshy.kz aqparat agenttigi.

Baıqaýǵa múlikti ıelený jáne (nemese) olardyń ekonomıkalyq qyzmeti toqtatylǵan, qarjylyq turǵyda qabiletsiz dep tanylǵan (bankrot dep tanylǵan)  ÚEU-dy qospaǵanda, ÚEU-dyń derekter bazasynda tıisti málimetteri qamtylǵan, grantqa ótinim bergen qoǵamdyq uıymdar qatysa alady.

2018 jylǵy úkimettik emes uıymdarǵa arnalǵan granttardy taǵaıyndaý  josparyna sáıkes granttar 11 áleýmettik mańyzy bar baǵyttar boıynsha 87 taqyrypty quraıdy. Atap aıtqanda, bilim,  ǵylym, aqparat, dene shynyqtyrý jáne sport, azamattardyń densaýlyǵyn qorǵaý, salaýatty ómir saltyn nasıhattaý, jastar saıasaty men balalar bastamalaryn qoldaý jáne genderlik máselelerdi sheshý,  halyqtyń áleýmettik osal toptaryn qoldaý, azamattardyń quqyqtaryn, zańdy múddelerin qorǵaý, tarıhı-mádenı muralardy qorǵaý jobalary bar.

QR Din isteri jáne azamattyq qoǵam mınıstrligi Azamattyq qoǵam isteri Komıtetiniń málimetine sáıkes, atalǵan Jospar Qazaqstan Respýblıkasynyń memlekettik saıasatynyń basymdyqtary, Qazaqstan Respýblıkasynyń strategıalyq jáne baǵdarlamalyq qujattary, Prezıdent Joldaýlary, sondaı-aq memlekettik organdardyń jáne úkimettik emes uıymdardyń usynystary negizinde qurylady.

Memlekettik granttar baıqaýyna qatysýǵa ótinishter 2018 jyldyń 2-shi aqpanyna deıin qabyldanady.

Esterińizge  sala keteıik, Azamattyq bastamalardy qoldaý ortalyǵy komersıalyq emes uıym bolyp tabylady, ol Qazaqstan Respýblıkasy Úkimetiniń 2015 jylǵy 31 jeltoqsandaǵy Qaýlysyna sáıkes úkimettik emes uıymdardy granttyq qarjylandyrý salasyndaǵy operator bolyp tabylady.