Áleýmettik jelide áıelderge qol kóterý máselesi týrasynda Rızabek Battalov aıtqan ýaǵyzdyń vıdeosy taraǵan. Alaıda atalmysh vıdeonyń osydan úsh jyl buryn taspaǵa jazylǵany anyqtaldy. Bul týraly QMDB baspasóz hatshysy Aǵabek Qonarbaıuly óziniń Feısbýktegi paraqshasynda málimdedi, dep habarlaıdy Qamshy.kz aqparat agenttigi.
«Rızabek Battalulynyń: "Áıeldi árkez uryp turýǵa bolady", - degen ýaǵyzyna qatysty túsinikteme suraǵan áriptesterime mynadaı máselelerdi málimdeımin:
Birinshiden, áleýmettik jelide taraǵan beıne materıal osydan úsh jyl buryn taspaǵa jazylǵan. Osy vıdeo qazir qandaı "qajettiliktiń" negizinde qaıta jarıalanyp jatqanyn óz basym túsinbedim.
Ekinshiden, Rızabek Battaluly osyǵan deıin ımamdyq qyzmette bolmaǵan. Aqparattyq-nasıhat tobynyń múshesi retinde jamaǵat tarapynan túsken saýalǵa azamattyq kózqarasyn bildirgen. Búginde Almatydaǵy "Nur Múbárak" ýnıversıtetinde qyzmet etip júrgen R.Battalulyn "ımam" dep ataý - tilshiler tarapynan ketken qate aqparat. Buǵan jol bermeńizder!
Úshinshiden, kez-kelgen ýaǵyzshynyń sharıǵattaǵy shetin, názik máseleni óz tanymy men tabıǵatyna salyp túsindirýine jol berilmeıdi. Bul - jeńil jaýap bere salatyn jaǵdaı emes. Dindi adamdarǵa qorqytyp emes, súıinshilep jetkizińder nemese senderdiń aralaryńdaǵy eń qaıyrlylaryń - áıelderińe jaqsy qaraǵandaryń degen maǵynada keletin hadıster halyqqa kóbirek nasıhattalýy tıis. Jaǵymsyz minez kórsetken jarymyzǵa kórkem túrde túsindirý, oǵan nasıhat aıtý, shynaıy janashyrlyq sezimińdi jetkizý, tósekte jalǵyz qaldyrý, dáleldengen aıyby úshin ýaqytsha sóılemeı qoıý, taǵy basqa tárbıeniń ádep sheńberindegi amaldar qamshynyń soqqysynan asyp túsetin tásilder. Qıyny - qısyq qabyrǵany túzeımin dep ony syndyryp alý. Áıeldi kúshpen baǵyndyrý - sharasyzdyq, bálkim álsizdik. R.Battalulynyń sózin qoǵam qabyldamaı jatsa - bul tabıǵı qubylys.
Tórtinshiden, Qazaqstan musylmandary dinı basqarmasy ýaǵyz aıtýdyń ádebi men tártibine qatysty arnaıy Erejeniń jobasyn ázirleýde. Tártip Erejesi ýaǵyz aıtýdyń biryńǵaı júıesin qalyptastyrýǵa yqpal etedi», - dep jazdy Aǵabek Qonarbaıuly.
