AQSH qar qursaýynda qaldy. Eldiń shyǵys bóligine tóngen sýyq sıklon amerıkalyqtardy ábigerge salýda. Nú-Iorktan Florıdaǵa deıin borandatyp jaýǵan aq ulpanyń bıiktigi jarty metrge jetken.
Saldarynan Nú-Iork, Boston, Fıladelfıa sıaqty iri qalalarda mektepter men memlekettik mekemeler jabylǵan. 50 myńǵa jýyq adam jaryqsyz qaldy. Tabıǵattyń shálkes minezi ushaqtardyń áýege kóterilýine múmkindik bermeýde. Kesheli beri tórt myńǵa jýyq reıs keıinge shegerildi. Qalany aq qar, kók muzdan tazalaýǵa tótenshe jaǵdaı qyzmetkerleri jumyldyrylǵan. Sınoptıkter Atlant muhıtynyń jaǵalaýyna kelgen sıklonǵa «metereologıalyq bomba» degen aıdar taǵyp úlgerdi. AQSH-ta boran kesirinen sońǵy kúnderi 16 adam qaza tapqan. Onyń jeteýi kók taıǵaqta bolǵan jol apatynan ajal qushypty. Mundaı burqasyn AQSH -ta sońǵy on jylda bolmaǵan eken.
