«Qazaqstan» RTRK» AQ Basqarma tóraǵasy Erlan Qarın 2017 jyly arnada bolǵan ózgeristerge sholý jasady, dep habarlaıdy Qamshy.kz aqparat agenttigi.
"2017 jyl «Qazaqstan» telearnasy úshin ońaı bola qoıǵan joq, sebebi, jalpy telenaryqta telekórsetilim deńgeıi tómendeýde, biraq soǵan qaramastan biz jyldy jaqsy kórsetkishtermen qorytyndyladyq. "Barlyq 6+" aýdıtorıasynyń esepteýleri boıynsha, telearnanyń jyldyq ortasha úlesi 7,2% paıyzdy qurap, otandyq telenaryqta altynshy orynǵa jaıǵasty. Sońǵy jyldary kórermenge tanymal bolyp kelgen "Kelin" telehıkaıasynyń efırde toqtatylýy telearnanyń aýdıtorlyq kórsetkishteriniń tómendeýine ákelip soǵady degen boljam joqqa shyqty. Sebebi, telearna jobalarynyń turaqty kórsetkishteri men jańadan shyqqan ár túrli janrdaǵy telejobalar jáne úzdik sheteldik teletýyndylar medıanaryqtaǵy telearnanyń aýdıtorıasyn tómendetýge jol bermedi. Sońǵy 4-5 jylda kórsetilgen bul telehıkaıa aýdıtorlyq kórsetkishterdiń 25-40 % úlesin qalyptastyrýdy qamtamasyz etip kelgen. Degenmen, utymdy josparlaý arqyly jańadan sapaly kontent usynyp, naqty taım-slotty ilgeriletý jumystaryn oıdaǵydaı júzege asyrǵandyqtan, jaqsy nátıjelerge qol jetkize aldyq. Árıne, basynda bul telehıkaıanyń efırden alynýy aýdıtorlyq kórsetkishterge kúrt áser etti. Naýryz aıynan bastap, ıaǵnı úndi telehıkaıasy toqtatylǵan sátte telearnanyń reıtıńtik kórsetkishteri tómendeı bastaǵan bolatyn. Sonymen qatar, dál sol kezde efırde ótip jatqan qysqy sporttyq oıyndaryna arnalǵan Búkilálemdik Ýnıversıadanyń arnadaǵy translásıasynyń aıaqtalýy da óz áserin tıgizbeı qoımady. Oǵan qosa úsh birdeı arnanyń ortaq ólshemdik panelge enýi aýdıtorlyq kórsetkishterdiń bólinýine alyp keldi.
Al, biz óz tarapymyzdan kontentti jańartý jumystaryn júrgizýdi bastap ketken bolatynbyz. Sóıtip, 2017 jyldyń kúzinde korporasıada rebrendıng jumystary sátti júzege asyryldy. Efırdegi vızýaldy ózgerister men sapaly kontent telearna kórermenderiniń ulǵaıýyna alyp keldi. Qazan aıynan bastap reıtıń kórsetkishteri turaqtalyp, qarasha-jeltoksan aıynda aıtarlyqtaı ósý úrdisi baıqaldy. Sondaı-aq, efırdiń 79% ózimizdiń ishki ónim, bul basqa telearnalarmen salystyrǵanda eń joǵarǵy kórsetkish. Sonymen qatar, telearna ınternettegi jáne áleýmettik jelilerdegi óz ornyn keńeıte bastady. 2017 jyly YouTube vıdeohostınginde engizilgen Ulttyq arna jobalarynyń qaralymy jalpy eseppen 77 mln-nan asty! Osy oraıda «Qazsport» pen «balapan» telearnalary joǵarǵy kórsetkishterge ıe bolyp, 2017 jyldyń 1 qańtarynan bastap kórsetkish reıtıńisi ólshenetin telearnalar qataryna engenin aıta ketý kerek. Jyl qorytyndysy boıynsha, kabeldik telearnalardyń arasynda «balapan» telearnasy jalpy úlesi 3,1% paıyzben aldyńǵy qatardan oryn aldy. «Qazsport» telearnasynyń úlesi osy ýaqyt aralyǵynda 1,5% paıyzdy qurady. Al, korporasıa quramyna kiretin telearnalardyń jalpy úlesi «Barlyq 6+» aýdıtorıasy boıynsha 11,8% paıyzǵa jetti. Aýdıtorıanyń suranysy men talabyn eskere otyryp, efırdegi kontenttiń sapasyn arttyrý jumysy áli de jalǵasady".
Aıta keteıik Erlan Qarın «Qazaqstan» RTRK» AQ Basqarma tóraǵasy qyzmetine 2017 jyldyń aqpanynda taǵaıyndaldy.
