Almaty ákimdigi Naýryz meıramyna daıyndyq jumysyn áli bastamaǵan, dep jazady Qamshy.kz aqparat agenttigi.

Kún men tún teńelip, qys boıy qar qursaýynda jatqan bar tirshilik oıanatyn, jer men kók jańaratyn Ulystyń uly kúnine birer aı qaldy. Alaıda tyrp etken qala basshylyǵy joq. Naýryzǵa daıyndyq barysyna oraı jibergen saýalymyzǵa ákimdik: «Naýryz meıramynyń konsepsıasy ázirlený ústinde», – degen jaýap qatty.

Al kúntizbe boıynsha aýysatyn Jańa jylǵa daıyndyq barysyn 2017 jyly qazanda ákimdikten surastyrǵanymyzda ózimizge kerekti jaýapty sol aıda-aq aldyq. Onda merekege daıyndyq Táýelsizdik kúninen keıin bastalatyny, jergilikti búdjetten 600 mıllıondaı qarjy bólingeni, qalany bezendirý úshin qandaı dızaın elementteri qoldanylatyny búge-shúgesine deıin jazylǵan.

Jańa jylǵa daıyndyqtyń byltyr shyn mánisinde qashan bastalǵany qala turǵyndaryna málim. Táýelsizdik kúni bylaı tursyn, jeltoqsan aıy kirmeı jatyp qala túrli-tústi jyltyraqtarǵa tunyp turdy. Dúkender men iri saýda ortalyqtarynyń ishi-syrty bezendirilip, shyrshalar ornatyldy. Jańajyldyq kóńil kúıdi kúzdiń qara sýyǵynda-aq sezingen edik. Merekege oraı túrli jeńildikter jasalyp, baıqaýlar ótkizildi. Sonda Almaty ákimdiginiń eki sóılegeni me?

Bul – ár jyl saıyn aıtylyp júrgen bir saryndy áńgime. Aıta-aıta sharshaǵan halyqtyń qarasy kóp. Ǵasyrlar boıy qazaqpen birge jasasqan tól meıramymyz sovet ıdeologıasymen kelgen Jańa jyldyń tasasynda qalyp qoıǵaly qashan. Dálel kerek pe? Qazir elimizdiń keı óńirinde Ulystyń uly kúni bir-aq kún toılanady. Qala turǵyndary merekeni tek 22 naýryzda sezine alady. Onda da alańǵa baryp, jarty kún konsert tamashalaıdy. Bir kese naýryzkójesin iship, án tyńdaýmen-aq ýaqyty ótedi. Ákimdik ókilderi bir kúndik is-sharaǵa bola sonsha shabylamyz ba dep otyrǵan shyǵar.

Naýryz meıramy jóninde Prezıdent Nursultan Nazarbaev: «Tarıhy tereńde jatqan Naýryz merekesi qazaq jerinde árqashan toılanǵan, alaıda bir zamandarda halqymyz ony joǵaltyp aldy. Elimiz táýelsizdik alǵannan keıin tól merekemizdi biz qaıtadan jańǵyrttyq. Bul kúni urysqan aǵaıyn tabysatyn, renjisip qalǵan jastar qaıtadan tabysyp, mahabbattaryn arttyryp, bas qosatyn, barlyq jamanshylyq umytylatyn, jaqsylyqqa qaraı bet buratyn kez bolǵan. Túbinde bizdiń naǵyz jańa jylymyz osy Naýryz meıramy bolýy qajet. Qytaı óziniń jańa jylyn aqpannyń ortasynda bir apta toılaıdy. Shyǵystyń barlyq halqynyń óz jańa jyldary bar. Biz de túbinde óz merekemizge kelýimiz kerek», – degen bolatyn. Quıyp alatyn kulaq, túıip alatyn kóńil bolsa, qanekı? Alaıda Elbasynyń bul sózin Almaty ákimdigi eskere me?