Mindetti medısınalyq saqtandyrý júıesine qate nemese artyq tólengen aýdarymdar somasy men jarnany keri qaıtarýǵa bolady. Belgili bir somany qaıtarýdy jeke tulǵalar úshin aýdarymdar jasalǵan tizimde nemese tóleýshi jeke derekterdi toltyrǵan kezde qate jibergen jaǵdaıda retteýge bolady. Jeke kásipkerlerdiń ózderi jáne azamattyq-quqyqtyq sıpattaǵy kelisimshart boıynsha jumys isteıtin jeke tulǵalar úshin jarna tóleý 2020 jylǵa deıin shegerilgendikten, qate nemese artyq tólem jasaý derekteri jyl basynan beri birneshe márte kezdesti.
–Qarajattardy qaıtarý rásimi QR Densaýlyq saqtaý mınıstriniń №478 buıryǵymen rettelgen. Jarna tóleýshi belgilengen úlgi boıynsha qaıtarýǵa ótinish jazyp, «Úkimet – azamattar úshin» Memlekettik korporasıasyna tapsyrýy kerek, – deıdi Astana qalasy boıynsha «ÁMSQ» KEAQ fılıalynyń dırektory N.Qabdyqaparov.
Eger qate aýdarymdar jasalǵan jeke tulǵalar tiziminde jiberilgen bolsa, bul jaǵdaıdy rastaý anyqtamasy qosa beriledi. Tóleýshiler qolma-qol aqshamen tólem jasaǵan jaǵdaıda, rastaý anyqtamasynyń ornyna aýdarym nemese jarna tóleý týraly tólem qujatynyń kóshirmesi usynylady.
Memlekettik korporasıa ótinish túsken kúnnen bastap, bes operasıalyq kúnniń ishinde aýdarymnyń, jarnanyń nemese ósimpuldyń esepke alynǵanyn tekseredi. Ary qaraı ótinish berilgen tólem boıynsha barlyq derektemelerdi rastaıtyn qosymshalarmen birge Áleýmettik medısınalyq saqtandyrý qoryna jiberiledi
–Qor ótinishti qarastyrǵannan keıin MT-102 formatyndaǵy tólem tapsyrmasyn óńdep, tóleýshiniń ótinishi Qorǵa túsken kúnnen bastap, jeti operasıalyq kúnniń ishinde aqshany Memlekettik korporasıanyń bank shotyna aýdarady. Korporasıa túsken qarjyny tóleýshiniń shotyna aýdarady. Qor qaıtarylmaıtyn somalar boıynsha Memlekettik korporasıaǵa aqshany qaıtarýdan bas tartýdyń sebepterin kórsete otyryp, aqparat jiberedi, – dep túsindirdi N.Qabdyqaparov.
Memlekettik korporasıa Qor reestri negizinde tólem tapsyrmasyn óńdep, úsh operasıalyq kúnniń ishinde tóleýshige kúshi joıylǵan tólem somasyn aýdarady. Memlekettik korporasıa, eger qarajat qaıtarylmaıtyn bolyp tanylsa, tóleýshige onyń sebepteri týraly tolyq aqparat beredi.
