Áıeldi kólikke otyrǵyzyp, jolaı dúkennen dorbasyn toltyra azyq-túlik alyp berdi de, úıine jetkizip tastady. Ózderi álgi qojaıyn Nurlannyń egistik alqabyna qaraı jol tartty. Óń men tústiń arasynda ne bolyp, ne qoıǵanyn túsinbeı qalǵan Gúlnár bir orynda melshıip turǵan edi, tý syrtynan qyzy:
- Mama, kim bular? - dedi.
- Bilmeımin, qyzym. Allanyń jibergen adamdary shyǵar, - dedi kúbirlep. Toptasqan erkek shańdatyp kete bardy. Artynsha jarty saǵat óter- ótpesten urda-jyq Nurlan bet-aýyzy qan-qan bolyp úıge keldi de:
- Gúleke, keshirińizshi, meni… Mynaý sizdiń kúndik aqshańyz, - dedi de, bir býma saban aqshany aıaǵyna jyǵyla, qolyna ustatty.
Ań-tań bolyp turǵan Gúlnár demniń arasynda músápir kúıge engen qojaıynyn aıap, orynynan turǵyzdy. Sol kúnniń ertesine aýylda gý-gý ósek jeldeı esti. Barlyǵy jesir áıeldiń syrtynan áńgime aıtýda.
"Oıbaı, dalada jatqan jerinen bir top reket kelipti. Anaý Nurlandy aıaǵyna jyǵyp beripti".
"Egistikte aqyryp turǵan jerinen Nurlandy bir top erkek túsip, tepkilep: "Sen nege qazaq áıelin jylatasyń? Nege aqysyn bermeısiń?" dep qan-josa etipti".
Rasynda kólikten túsken Sabyrjandy kórgende Nurlannyń kózi atyzdaı bolyp ketkeni bylaı tursyn, qoryqqanynan "kish" etkizip jibergenin búkil aýyl bildi. Sol oqıǵadan keıin Nurlan basqa jaqqa jer aýdarylyp ketti.
Iá, bul buıra shashty erkek rasynda 90 -jyldardaǵy ataǵy jer jarǵan Sabyrjan Músilimuly bolatyn. Jesirin jylatpaǵan, jetimin jáýteńdetpegen azamattyń sońyna quqyq qorǵaý organynyń adamdary sham ala tústi. Ár nárseni syltaýratyp, aqyry bireýdiń syıǵa tartqan qanjardy kóliginen taýyp, "sýyq qarý" bar dep ustady da, úsh jylǵa bas bostandyǵynan aıyrdy. Túrmede jatqanda aýrý juqtyryp, abyrjyp júrse de, "Qorǵas" jaqtaǵy qytaılardy shekaradan ótkizbeýge bel býǵan qazaq azamatyn búginde kózi kórgender saǵynyshpen eske alady. Mı qaınatar ystyq kúni Gúlnárdiń esinen tanyp jatqanyn kórgen Sabyrjan jesir áıeldi kezdestirgen jyly qatty syrqattanyp turǵan bolatyn. Aqyry syrqaty asqynyp, kóp uzamaı ómirden kóz jumdy.
Jazba Bıbigúl Dáýletbekqyzynyń Facebook paraqshasynan alyndy
