Túrkıada jattyǵýda júrgen Qytaıdyń olımpıada quramasy Armenıanyń 21 jasqa deıingi ulttyq quramasymen kezdesip, olardy 4:0 esebimen jeńdi. Fýtbolda Qazaqstan sıaqty joly bola bermeıtin qytaılyqtardyń bul jeńisi táp-táýir nátıje. Onyń ústine olar Armenıany jeńip otyr. Alaıda, bizdiń aıtpaǵymyz bul emes. Áńgime Qytaıdyń olımpıadalyq fýtbol quramasyna qabyldanǵan qytaılyq qazaq qandasymyz jaıly bolmaq. Ol – Erjet Erzatuly. Armenıamen bolǵan oıynda óz quramsyn jeńiske jetelep, tamasha oınaǵan Erzat Qytaı qaqpasyn goldan aman saqtady. Quramanyń negizgi qaqpashysy bolǵan Erjet, armándardyń tepken dobyn ustap, shabýylshylaryn ábden álekke saldy. Esterińizde bolsa Erjet 2009-jyly Qazaqstan prezıdenti kýbogynda erekshe ónerimen kózge túsip, «kórermen kózaıymy» atanǵan bolatyn. Sol sátten bastap Erjetke Eýropa klýbtary usynys jasaı bastady. Tipti, Qytaıdyń premer-lıgasyndaǵy myqty klýbtarda usynys tústi. Biraq Erjet Eýropany tańdady. Sóıtip, Portýgalıanyń úshinshi lıgasynan biraq shyqty. Ony óz qatarlaryna qosqan «Gondomar s.c» komandasy. Erzat Eýropa alańdarynda dop tebetin tuńǵysh shynjańdyq fýtbolshy. Az ýaqyttyń ishinde Portýgaldyq ujymnyń negizgi qaqpashysy atanǵan ol ózin jaqsy qyrynan tanyta bildi. Soǵan oraı portýgaldyq klýb oǵan beretin syıaqyny joǵarylatyp, kelisimdi taǵy bir jylǵa sozyp, bıylǵy maýsym aıyna deıin uzartqan bolatyn.
Qytaı premer lıgasyndaǵy birqatar komandalardyń jasaǵan usynystaryna qaramaı, Portýgalıanyń tómengi lıgadaǵy komandasyn tańdaýynyń sebebin ol «Eýropada oınaý — burynnan bergi armanym. Sol úshin Eýropaǵa baramyn», — dep túsindirgen. Aıta keteıik, portýgaldyq «Gondomar s.c» komandasy 1921 jyly qurylǵan. Portý aımaǵyndaǵy Gondomar qalasynda ornalasqan. Bul komanda buryn Portýgalıanyń negizgi lıgasynda oınaǵan. Keıin kelisilgen machtarǵa qatysy bar degen sheshimnen soń tómengi lıgaǵa túsirilgen. Áıtpegende, Erjet Portýgalıanyń tómengi dıvızıonynda emes, «Portý», «Benfıka» syndy myqty klbýtarǵa qarsy oınar edi.
Murat Almasbekuly
