Tús aýa uıqysynan oıanǵan ánshi, kompozıtor Yrbıgúl janushyra týaletke júgirdi. Keshe túnde úlken merekelik sharaǵa qatysyp, júz birdeńe ult mekendeıtin baqytty elindegi ashshy-tushshysymen dańqy shyqqan Koreı meıramhanasyna joly túsken. Jaqpaıtynyn bilse de, kózi qımaı, ústel toly tańsyq taǵamdardan qarbytyp-aq jiberip edi. Endi, mine, qyryq túrli qyshqyldan quralǵan dámdeýishter óziniń kúshin kórsete bastady. İshi taýdan kóshkin júrgendeı gúrildegen Yrbıgúl týalette aq ter-qara terge túsip, «İshim-aı … ishim-aı …», – dep yshqynýmen boldy. Qınalyspen uzaq otyryp, tósegine jaqyndaı bergeni sol edi, ishi qaıtadan burap aýyryp, keri zyńǵydy.
Týalette aýa joq: bojyǵan, jıdigen kúlimsi ıister qolqany qabady. Ádette joq nársege kirpideı jıyrylyp, kirpázdanyp júretin Yrbıgúl bul joly aýzy-murnyn tumshalaýdyń ornyna jalańash sanyn shapalaqtap, ózgeshe kúıge endi. Shabyty kele qalǵan eken ... shabyt shirkin jer tańdaı ma?! Yńqyly yńylǵa ulasty. «İshim-aı ... ná-ná-náı... ná-ná-náı... ishim-aı... ná-ná-ná-ná-ná-ná-náı...». Sanyn burynǵydan da jitirmelete shapalaqtady ... Iá sát! Bekerge jinikpegen eken, kóp ótpeı qulaqtan kirip, boıdy alatyn oınaqy áýen dúnıege keldi. Aıtqan saıyn aıtqysy kele berdi. Týaletti basyna kóterdi. Teleefırden kúnine bir án jazatynyn aıtyp suhbat bergende kúlkige aılandyryp, tabalaǵandar da tabylǵan, al kúlińder endi. Shabyty sharyqtap, ishiniń aýyrǵanyn umytqan Yrbıgúl jańa ánin jazdyrý qamyna kiristi. Aldymen oıyndaǵydaı mátin jazdyrý kerek, birden aqyn qurbysy Saýnagúlge telefon shaldy. Ánniń qalaı týǵanyn, shabytynyń qalaı kelgenin, ne iship, ne jegenin jipke tizgendeı qylyp tátpishtep baıandap berdi. Án mátininde «ishim-aı» sóziniń saqtalýyn erekshe eskertti. Myna sáıkestikke qaramaısyz ba? Syrlas dosy da býyn-býyny bosap, samaıynan alty aıǵyz ter aǵyp, parda qyzdyrynyp otyrǵan eken, ótinishin eki etpedi. Qas pen kózdiń arasynda SMS-pen mátin jazyp jiberdi. Áýenge quıyla ketti:
İshim-aı, ishiń-aı!
Aýyrmasyn ishiń-aı!
Aýyrsa da ishiń-aı,
Bári eliń úshin-aı!
Stýdıada án jazdyrǵan kezde de Yrbıgúl týaletke myń kirip, myń shyqty. Osylaısha Yrbıgúldiń áýeni týalette, sózi saýnada jazylǵan jańa áni áýe tolqynyna shyqqan sátten bastap sýperhıt bolyp shyǵa keldi. Besiktegi baladan beli eńkeıgen kárige deıin áýenine elitip, «İshim-aı, ishiń-aı, aýyrmasyn ishiń-aı!», – dep bıleıtin boldy. Sońǵy eki joly ásirese atqa minerlerge erekshe unaǵan sıaqty, burynǵydan da mindetsinip shalqaıatyn boldy. Ánniń qurmetine memlekettik deńgeıde úlken shoý uıymdastyryp berdi. Yrbıgúldiń dostary ótken kúnnen estelik aıtysty. Bala kezde tyǵylmaq oınaǵanda, Yrbıgúldiń ylǵı da týaletke jasyrynatynyn eske alysty. Keshtiń túıin sózi ataǵy men ordeni eki esekke júk bolatyn ónertanýshy Zerdesiz Zerdebaev myrzaǵa berildi. Aınalasyna qorazdana qarap, jótkirinip alǵan Zerdebaev Yrbıgúldiń janashyl stıline erekshe toqtaldy. Burynǵy aqyn-ánshiler taý-tas kezip, tabıǵat aıasynan shabyt izdese, Yrbıgúl mundaı áýre-sarsań, eski dástúrge toıtarys berip, dala kezbeı-aq, taza aýasyz týalette otyryp ólmes án jazýǵa balatynyn dáleldedi. «İshim-aı» ániniń shyǵý tarıhyna qanyqqan jankúıerler shoýdan keıin týaletke aǵyldy. Týalettiń esigin ishinen ilip alyp, saǵattap shabyt shaqyratyndar kóbeıdi. Qaıda barsań – úıde de, túzde de qyrǵyn kezek. Bul másele depýtat Uıatsyz Uıalǵanov myrzany beı-jaı qaldyrmady. Úkimetten «İshim-aı» sıaqty hıt ánderdiń kóptep jazylýy úshin kósheler men úılerde týalet sanyn kóbeıtýdi talap etti.
