Qurmetti qazaq aǵaıyndar, ǵasyrlarǵa jalǵasqan otarlaý saıasaty saldarynan jartykesh kúıge túsken ulttyq tilimizdi qalpyna keltirýdi el táýelsizdiginiń alǵashqy sátinen bastasaq ta kúni búgin aıtarlyqtaı nátıjege jete almaı kelemiz. Ata zańymyzben bekitip, memlekettik til mártebesin berdik. Arnaıy zań qabyldadyq. El basymyz da udaıy aıtyp, naqty tapsyrmalar berip keledi. Basqany qoıǵanda Elbasynyń  «qazaq qazaqpen qazaq tilinde sóılessin» degen aqyl da naqyl ıdeıasyna da qulaq asqan joqpyz. Ananyń aq sútimen daryǵan ulttyq tilimizden nege sonshalqty alshaqtap kettik?  Árıne, kóbimiz bul suraqtyń jaýabyn da bilemiz. San jyldar boıy boıymyzǵa sińgen quldyq sanadan áli de qulan taza aıyǵa almaı kelemiz. Álemdegi ózge ulttarmen salystyrǵanda ulttyq namysymyz tómen, salǵyrtpyz, asa mańyzdy istiń ózine nemquraıly qaraımyz, taǵysyn taǵy...

Tilin joǵaltqan halyq – ólgen halyq. Qazaqtyń tilinsiz Qazaq memleketi bolý múmkin emes. Eger tilimizden aıyrylsaq, ultymyz da joq, kórgen kúnimiz kún emes, qarańǵy túnek. Ár ult óziniń tilimen maqtanady. Óıtkeni ultyn ult etetin sol qasıetti tili.

Kúni búgin óz tilin tastap ózara oryssha sóılesip turǵan eki qytaıdy nemese qytaısha sóılesip turǵan eki orysty, tipti álemdik tilge aınalǵan aǵylshyn tilinde sóılesip turǵan eki japondy kórdik pe? Joq. Eger olaı bolsa mundaı qasiret qazaqtyń  ǵana basynda  tur. Óz tilimizdi ózimiz mensinbeıtindeı, jek kóretindeı qazaqtyń tili sonshalyqty nashar, oıymyzdy jetkizý múmkindigi shekteýli til me?  Joq, áste olaı emes. Qazaq tili álemdegi eń baı, eń naqyshty, mánerli tilderdiń biri ekenin álem ǵalymdary moıyndaǵan. 

Sondyqtan osy bir mańyzdy máselege qatysty qadirli halqym, ardaqty qandas aǵaıyndar, ózderińizge ashyq hat joldap otyrmyz.

Ashyq hat degenniń de maǵynasy aǵaıynmen emen-jarqyn ashyq syrlasýǵa saıady. Jýyqta «Tarıhı atajurt» qoǵamdyq birlestigi óziniń alǵashqy quryltaıynan ishimizdegi alaýyzdyq, kóralmastyq, baqtalastyqty sanamyzdan alastaý maqsatynda Qazaqstan halqyna arnap, «Qazaq elim máńgi jasasyn» atty úndeý qabyldady. Osy qujatty talqylaý barysynda     pikir, usynys bildirýshiler úndeýdiń mátinine halyqqa Elbasynyń ózi  aıtqan  «qazaq qazaqpen qazaq tilinde sóılessin» degen sóılemdi kirgizeıik dep pikir aıtty. Zaldaǵy quryltaı ókilderi túgeldeı  dý qol shapalaqtap, bir aýyzdan qoldady.

Bul neni kórsetedi? Joǵaryda aıtqandaı ulttyq namysymyz sonshalyqty tómen emes ekendigin kórsetedi. Qazaqtyń báriniń de óz tilinde sóıleýin armandaıtynynyń, kókseıtininiń belgisi.

Ana tilimizdi álemdegi órkenıetti tilder qataryna jetkizý úshin ne iseýimiz kerek? Bastysy ne isteýimiz emes, neden bastaýymyz kerek? Óıtkeni oıdaǵydaı nátıje bermeı turǵany bolmasa, istelip jatqan sharýa az emes. Oılanaıyq aǵaıyn! Mynaý jahandaný atty ajdaha zamanda bógde órkenıetke jutylyp ketpeı qazaq qalpymyzda qalý úshin aýadaı qajet ana tilimizdi ardaqtaýdy qazaq qazaqpen tek qazaqsha sóılesýden bastaıyq!

   Sol úshin:

1. «Eki aqqýdyń bir basshysy», «qoı bastaıtyn serkesi» degendeı eki qazaq óz ara qazaqsha sóılesýdi bılik basyndaǵy laýazym ıelerinen bastaıyq.
2. 2018 jyldy eki qazaq ózara ózgeniń emes, tek óz tilinde sóılesetin jyl etip, qazaqtyń tiliniń baǵyn ashaıyq.
3. Ulttyq tilin bilmeıtin árbir qazaq azamaty ózine qortyndy jasaı otyryp, quldyq sanadan shyǵatyn ýaqyttyń jetkenin túsineıik.
4. Ózara óz tilinde sóılegen eki qazaqqa qurmet kórseteıik, syılaıyq, senim artaıyq, ana tilin tez arada jete meńgergen qazaq azamattarynyń jolyn ashyp, olardyń ishindegi bilimdi, biliktilerin atqarýshy bılikke, parlament depýtatyna deıin kótereıik.
5. Qazaqtyń tilin qorlaǵan, janashyrlyq tanytpaǵan ózge tilde shúldirlegenderge qatań talap qoıaıyq. Ondaılarǵa jol bermeıik. Bir jyldyń ishinde tolyǵynan qazaqsha sóıleı almaǵan qazaq azamattaryna senim júktep memleket taraprynan jumysqa taǵaıyndaýdyń ózi qıyn bolatynyn túsindireıik.
6. Qazaq tilin qarqyndy damytýǵa baılanysty qarapaıym halyqtyń ózderi tómennen bastama kóterip, Elbasynyń rýhanı jańǵyrý ıdeıasyn qoldaǵan osy bir mańyzdy isti úkimettik uıymdar qoldasa, halyq pen memlekettiń ara baılanysy arta beretini de sózsiz.

   Sóıtip búkil qazaq atsalysa otyryp, 2018 jyly  qazaq tiliniń mártebesin kóterip, rýhymyzdy jańǵyrtaıyq.

«Tarıhı Atajurt» qoǵamdyq birlestigi