Ońtústik Koreıada ótip jatqan qysqy Olımpıada oıyndarynda qazaq qyzy Dınara Álimbekova altyn medal aldy. Ol Belarýs quramasy sapynda bıatlonnan 4h6 shaqyrymdyq áıelder estafetasynyń jeńimpazy atandy. Qazaq qyzdarynan shyqqan tuńǵysh olımpıada chempıony kim? Qaıda týyp-ósti? Qandaı adam? Qamshy.kz aqparat agenttigi ashyq derekkózden alynǵan málimetterdi usynady.

Qazaq tekti belarýs qyzy

Dınara Álimbekova 1996 jyly Qaraǵandy oblysyndaǵy Abaı qalasynda dúnıege kelgen. Úsh jasynda ata-anasymen Belarýske qonys aýdarǵan. Ákesi – qazaq, anasy – belarýs (keıbir derekterde orys). Ózinen keıin Evgenıı jáne Ýlána esimdi inisi men sińlisi bar. «Meniń sanaly ǵumyrym Belarýste ótti. Ózimdi júz paıyz belarýs qyzymyn dep sanaımyn», – deıdi Dınara.

Belarýs prezıdenti Aleksandr Lýkashenko bıatlon estafetasynda jeńiske jetken Dınara Álimbekova, Nadejda Skardıno, Dará Domracheva, Irına Krıvkony «Jeke erligi úshin» ordenimen marapattaý týraly qaýlyǵa qol qoıdy.

Dınara Álimbekova – Belarýs Respýblıkasynyń eńbek sińirgen sport sheberi. 2015 jyly jastar arasyndaǵy álem chempıonatynda altynnan alqa taqqan.

Fortepıanoda oınaıdy, snoýbordpen syrǵanaıdy

Dınara Álimbekova halqynyń sany 10 myńnan sál-aq asatyn Chaýsy qalasynda ósti. Horeografıamen aınalysyp, óner mektebindegi fortepıano synybynda oqydy. 11 jasynda  alǵash ret aıaǵyna shańǵy kıdi. «Sportqa jan-tánimmen berilgenim sonshalyq, sabaqtan góri jattyǵýdy jaqsy kóretinmin», – deıdi Dınara. Basynda bárine úlgerýge tyrysyp, sport jarystaryna da, mýzyka baıqaýlaryna da qatysatyn. Keıin bıatlonǵa birjola den qoıady.

Otbasynda sportshylar joq. «Atam ǵana salaýatty ómir saltyn ustanady, qysta jalańaıaq júgirip shynyǵady», – deıdi Dınara. Ózi kónkı men snoýbordqa qyzyǵady. Adrenalınge jany qumar.

Joǵary bilimdi bıatlonshy

22 jastaǵy Dınara Álimbekova – joǵary bilimdi bıatlonshy. Belarýs memlekettik dene shynyqtyrý ýnıversıtetiniń Shańǵy sporty jáne bıatlon kafedrasynda oqyǵan. Atalmysh oqý ornyn 2017 jyly bitirip shyqqan.