Áleýmettik medısınalyq saqtandyrý qory tirkeý erejesine ózgeris engizýdi kózdep otyr, bul rette azamattar emhananyń tirkelý  bólimine júginbeı-aq tirkeletin bolady, dep jazady Qamshy.kz aqparat agenttigi.

Bul qyzmet  densaýlyq saqtaý júıesinde elektrondy qyzmetterdi odan ári damytýǵa jáne pasıentterdiń quqyǵyn qorǵaý tetikterin jetildirýge baǵyttalǵan. Azamattardyń barlyq qajetti qujattary HQKO nemese egov.kz portaly arqyly qabyldanady.

Mundaı tásil bir mezgilde birneshe máseleni sheshýge múmkindik beredi. Atap aıtqanda, tirkeý týraly málimetterdiń medısına uıymdary tarapynan burmalaný qaýpin tómendetip, emhanalardyń tirkeý bólimderine túsetin júkti azaıtady. Sondaı-aq, azamattardy tirkeýden negizsiz bas tartý faktilerin qysqartady. MÁMS júıesin engizý sheńberindegi ınovasıalar qoldanystaǵy erejelerdi ózgertýdi talap etedi.

- Azamattardy HQKO arqyly tirkeý qyzmetiniń engizilýine baılanysty, halyqty emhanaǵa tirkeý tártibine tolyqtyrýlar men ózgerister engizý kózdelip otyr. Onda alaqol medısına uıymdarymen ózara qarym-qatynas jáne tirkelgen pasıentterdiń quqyqtaryn qorǵaý tártibi jan-jaqty jazylady, - deıdi Astana qalasy boıynsha «ÁMSQ» KEAQ fılıalynyń dırektory Nurlybek Qabdyqaparov.

Jetildirilgen tirkeý qyzmetteri 2018 jyldyń III-IV toqsanynda qoljetimdi bolady.  Azamattar HQKO arqyly medısınalyq uıymdy erkin tańdaý quqyǵyn paıdalana otyryp, medısınalyq qyzmet kórsetýshilerdiń biryńǵaı derekqoryna engizilgen emhanaǵa tirkele alady.  Sonymen qatar, qazaqstandyqtar emhanaǵa HQKO arqyly tirkele otyryp, qaı jerde tirkelgeni týraly málimetti de sol ortalyqtardan alatyn bolady. Qazirgi tańda bul qyzmetter onlaın tártipte - egov.kz portaly arqyly, offlaın tártipte - emhanalarda kórsetiledi.

Astanada 27 medısınalyq mekeme tirkelgen turǵyndarǵa qyzmet kórsetedi, onyń 13-i memlekettik jáne 14-i jeke medısınalyq uıym.