16 naýryzda «Tumar» Ulttyq televızıalyq báıgesiniń jeńimpazdaryn saltanatty túrde marapattaý rásimi ótedi. Bul týraly QR Aqparat jáne komýnıkasıalar mınıstri Dáýren Abaev málimdedi, dep habarlaıdy Qamshy.kz aqparat agenttigi.

«Respýblıkalyq, aımaqtyq telearnalarda eńbek etip júrgen shyǵarmashylyq toptardy yntalandyrý maqsatynda qolǵa alynǵan bul shara osymen ekinshi ret uıymdastyrylǵaly otyr. 

Bıyl «Tumar» báıgesi qazaq televızıasynyń 60 jyldyq mereıtoıy aıasynda ótetini de óte qýanyshty. Óıtkeni bul kúndi el jýrnalısıkasy úshin aıtýly data desek te qatelespeımiz», - dedi Dáýren Abaev.

Sondaı-aq mınıstr  televızıa salasynda qyzmet etken jáne eńbek etip kele jatqan maıtalmandardy qazaq televızıasynyń 60 jyldyǵymen quttyqtady.

«60 jyl az ýaqyt emes. Osy ýaqyt aralyǵynda qazaq televızıasy jan-jaqty ósti. Osy oraıda otandyq televızıa salasyn damytýǵa bar kúsh-jigerin jumsaǵan ardagerlerimizdi ulyqtaý, eńbekterin umytpaý bizdiń basty mindetimiz. 

Almatydan eń alǵash barsha jurtqa habar taratqan dıktorlar men redaktorlardyń, tehnıkalyq toptyń atqarǵan ıgi isteri eldiń esinde. Qazaq televızıasynyń ár salasynda túrli qyzmet jasaǵan áli de eńbek etip kele jatqan aǵa-apalarymyzdyń ónegeli isin jas urpaqqa úlgi etýge tıispiz. Tele sala ardagerleriniń arasynda ómirden ótip ketken maıtalman mamandar da boldy. Ol tulǵalarymyzdyń beınesi men daýysy, qoltańbasy arhıvte saqtaýly. 

Áli kúnge deıin jas jýrnalıserdiń boıyna bilgen-túıgenin, mol tájirebıesin sińirip júrgen korıfeılerimiz bar. Mátin zergerleri men sóz sheberlerin, rejıser, operatorlardy qazaq televızıasynyń 60 jyldyǵymen shyn júrekten quttyqtaımyn! 

Elimizdiń efırinde júrgen barlyq býyn úlken qurmetke laıyq. Sizderge zor densaýlyq pen shyǵarmashylyq tabys tileımin!», - dedi mınıstr.