QR májilisiniń depýtaty Bekbolat Tileýhan "Nur Otan" partıasy janyndaǵy quqyqtyq keńes otyrysynda OQO-daǵy Saryaǵash aýdany Abaı aýylynyń 7 jastaǵy turǵynyna qatysty pikir bildirdi, dep habarlaıdy Qamshy.kz aqparat agenttigi.
- Jantúrshigerlik oqıǵa. Qazaqtyń qaımaǵy buzylmaǵan ońtústik óńiriniń Saryaǵashynda, onyń ishinde uly dana Abaıdyń atyn ıemdengen aýylda. Áńgimege arqaý Ózbekáli Jánibekov atyndaǵy mektepte oqıtyn ana súti aýzynan keppegen 7 jasar balanyń jaǵdaıy. Qoǵamnyń aıyptap jatqany – Júsip Balasaǵun atyndaǵy mekteptiń joǵary synyp oqýshylary jasady degen qulaq estip, kóz kórmegen sumdyq.
Biz eldi-meken, mektepterimizge aıaýly tulǵalarymyzdyń esimin berippiz, ónegesin eskermeppiz.
Jeti jasar balanyń ómirindegi tragedıaǵa jany túrshikpeıtin qoǵamnyń ózinen de túrshigýge bolady. Biraq bul jaǵdaıda azamattyq qoǵamnyń aınasy delinetin áleýmettik jeli durys reaksıa berip jatyr. Osy balanyń quqyn qorǵaýǵa talpynyp jatqan, ákimshilik ıa polısıanyń tarapynan bolýy múmkin kózjumbaılyqqa alańdap jatqan aǵaıynnyń ár postyn oqyp otyrmyz. Toqyp jatyrmyz.
Qoǵam talaby qashan da eskerilgen. Kóptegen ózgeristerge qozǵaý bolǵan. Qalaı degenmen, kinálary dáleldense, kim bolsa da, ádil jáne múmkindiginshe qatal jazasyn alýy tıis! Osyǵan aıaýshylyq jasap, jymyn bildirmeı jaba salaıyq degen pıǵyldaǵy adamnyń bári – sybaılas, sony bilsin! Pedofılıaǵa qatysty zańnamadaǵy jazanyń bárin kúsheıtý kerek!
Munda Aıagózdegi sý basýǵa alańdap jatyrmyz ǵoı, ol – tabıǵattyń isi, aıtyp kelmeıtin apat edi. Al Saryaǵashtaǵy sumdyq – adamnyń isi, aıtýǵa aýyz barmaıtyn aıýandyq edi. Bunyń túp-tamyryn qazsaq, árqaısymyzǵa tireledi. Jergilikti deńgeıde synyp jetekshisi, mektep ınspektory, mektep psıhology, ata-ana, mektep basshysyn kinálarmyz. Ornynan keter, ornyna basqa adam keler, jaraıdy. Biraq, memlekettik jastar ıdeologıasynyń ıý-qıýy shyqqanyn, qoǵamdyq uıattyń azaıǵanyn, kınodan sán, ánnen mán ketkenin mundaı sheshimmen túzeı almaısyz. Túzeı almaımyz.
Qazir Zaǵıpa Balıeva áriptesim Shymkentte bala men onyń ájesiniń qasynda eken. Búgin «Nur Otan» partıasy janyndaǵy quqyqtyq keńes otyrysynda quzyrly organ basshylaryna qoǵam alańdaýshylyǵyn jetkizdik, - dedi Bekbolat Tileýhan.
Pikir qaldyrý