Denesinen ıne tabylyp, asqazany ýly suıyqtyqtan kúıgen OQO-nyń Aına esimdi turǵynyna qatysty oqıǵa halyq arasynda qatty talqylanyp jatyr. 8 jastaǵy qyzdyń taǵdyryna qoǵam belsendileri nazar aýdarǵan soń Túrkistandaǵy bılik ókilderi jaǵdaıdy baqylaýǵa aldy, dep jazady Qamshy.kz aqparat agenttigi tengrinews.kz-ke silteme jasap.

Túrkistan qalasy ákiminiń orynbasary Ǵanı Yrysbek qyzdyń úıine áleýmettik qyzmetkerler jıi baryp, otbasyndaǵy psıhologıalyq ahýaldy qadaǵalaıtynyn aıtady.

«Biz qyzdyń qazirgi jaǵdaıyna jaýap beremiz. Qyzdy otbasynda renjitpeı me, qalaı oqyp jatyr – sony tekseredi. Men qyzdyń ata-anasymen sóılestim. Aına qazir mektepte oqıdy, damýynda eshqandaı aqaý joq. Oblystyq densaýlyq saqtaýdan basqarmasynan kelgen komısıa da tekserdi. Qyzdyń damýy jaqsy ekenin olar da aıtyp otyr. Án aıtady, oqıdy, mekteptegi is-sharalarǵa qatysady», - dedi Ǵanı Yrysbek.

Ákim orynbasarynyń aıtýynsha, 8 jastaǵy Aınaǵa qatysty eldi alańdatqan jaǵdaı 2012-2014 jyldar aralyǵynda bolǵan. Ol ýaqytta qyz múlde kishkentaı edi.

Qyzdyń ata-anasy onyń jaǵdaıy nasharlaǵanyn baıqaǵan. Túrkistandaǵy aýrýhanada qyzdyń basyn MRT-ǵa túsirip, basynan eki ıne tapqan.

«Ol ýaqytta qyz 2-3 jasta bolatyn. MRT jasaǵanda basynan eki ıne tabylǵan. Dárigerler operasıa jasaý kerek ekenin aıtqan. Osydan keıin qyzdyń ata-anasy Arýjan Saınnyń «Meıirim» qoryna járdem surap barǵan. Ol qarajat jınap, qyzǵa Astanada kómek kórsetildi. Shetelge de jiberdi, biraq ata-anasy elge kelip, qyzdaryn Qazastanda emdetýdi uıǵardy», - dedi ákim orynbasary.

Arýjan Saınnyń bastamasymen quqyqqorǵaý organdary QR QK 1 bólimi 141 baby boıynsha qylmystyq is qozǵady. Alaıda tergeý jumystary nátıjesinde, ata-ananyń áreketinen qylmys quramyn tappady. Qylmystyq is toqtatyldy.

Aıta keteıik, qoǵam qaıratkeri Arýjan Saın óziniń Facebook paraqshasynda 2011 jylǵy Aına esimdi qyzǵa qatysty jantúrshigerlik málimetter jarıalaǵan.