Talǵar aýdanyndaǵy Qyzylqaırat aýylynyń turǵyndary 10 jyldan beri mı batpaqtan kóz ashpaı otyr. Qystyń sýyǵy qaıtyp, kóktemniń kelgenine aýyl turǵyndary qýanbaıdy. Sebebi qar erip, laı basqan kósheler halyqty ábden mezi etken. Ashynǵan jurt Qamshy.kz aqparat agenttiginiń poshtasyna hat joldap, kómek surapty.

Qyzylqaırat aýylynyń mańyndaǵy nebári alty kósheden turatyn aýdandy on jyldan beri halyq «Keleshek aýyly» dep atap ketken. Alty kósheniń bireýine ǵana asfált tóselipti. Onyń ózin basqa kóshelerdiń balshyǵyn basqan adamdar men kólikter ary-beri júrgen saıyn lastap ketedi.

«Alyp shahar Almatynyń irgesinde ornalasqanymen, aýdan ákimdigi kóz qyryn da salmaıdy», - degen aýyl turǵyndary qapaly. Turǵyndar kóshedegi shuńqyrdy ózderi jamap, taspen tegistep turady. Alaıda jańbyr jaýǵan saıyn beti laılanyp, qaıtadan batpaqqa aınalady.

«Kóshede adam túgil kólik júre almaıdy. Jyl saıynǵy eseptik kezdesýlerde talqylaıtyn máselemiz – osy. «Áne salamyz, mine salamyz» degen ákimniń sózine senbeıtin boldyq. Endigi úmit ózderińizde!», - dep jazypty aýyl turǵyndarynyń biri.

Almaty mańyndaǵy aýyldardyń máselesi qashan sheshiledi?

Qamshy.kz aqparat agenttiginiń tilshisi Alataý aýyldyq okrýginiń ákimi Qýatbek Smaǵulovpen sóılesti. Ákimniń aıtýynsha, osy ýaqytqa deıin sý qubyry júrgizilgendikten, asfált salý kelesi kezekke josparlanǵan. Al halyq beker daýryǵyp otyr.

«2016 jyly «Nurly jol» baǵdarlamasy boıynsha 517 mln teńge bólindi. Ol qarajat byltyr qarashada bitti. Ol aqshaǵa aýyldyń ishinde biz sý qubyryn júrgizdik. Byltyrdan beri aýyl turǵyndary alǵysyn aıtyp, taza cý iship otyr.  Buryndary halyq taýdyń basyndaǵy sýdy buryp ákelip ishetin. Qazir, Qudaıǵa shúkir, sýdan tapshylyq kórip otyrǵan joq. 2016-2017 jyldary bastalǵan jumys barysynda kósheniń bárin qoparyp, sý qubyryn júrgizdik», - dedi ákim.

Smaǵulovtyń sózinshe, aýyldy damytý, kórkeıtý boıynsha jospar kóp.

«Úkimetten aqsha surattyq, ótinish jazdyq Endi tek jaýap kútip otyrmyz. Qazir gaz tartylyp jatyr. Bári bitken soń endigi josparymyz asfált bolmaq. Bir aýyldyń ishinde 80-90 kóshe bar, bıyl Qyzylqaırattyń segiz kóshesine, odan ózge de aýyldarda 2-3 kóshege asfált salý jospary tur. Ótinishimizge jaýap kelse, 2019 jyly bastap ketemiz. Jalpy, jobamyz daıyn, josparymyz jaqsy», - dedi ákim.

Qýatbek Smaǵulov halyqtan sál shydaýyn ótindi. Sebebi sý tartylmaı jatyp kóshege asfált salynsa, sý qubyryn tartý úshin kósheni qaıta qoparýǵa týra keledi. Al bul halyq úshin de, úkimet úshin de tıimsiz. Onyń ústine, Alataý aýyldyq okrýgine bir ǵana Qyzylqaırat emes, 10 aýyl qaraıdy. Ákimniń aıtýynsha, báriniń jaǵdaıyn jasaý úshin de ýaqyt kerek. Ol aldaǵy bes jyl kóleminde bar másele ońynan sheshiledi dep sendirdi.

Aıta keteıik, Elbasy shaǵyn jáne orta bıznes úshin nesıe kólemin 20 mıllıard teńgege arttyrý týraly  bastama kótergen. Basty mejede aýyl sharýashylyǵyn damytý máselesi tur. Osy rette Úkimet basshysy Baqytjan Saǵyntaev eńbek jáne halyqty áleýmettik qorǵaý, ulttyq ekonomıka, aýyl sharýashylyǵy, qarjy mınıstrlikterine jáne «Atameken» Ulttyq kásipkerler palatasyna: birinshi, aǵymdaǵy jylǵa respýblıkalyq búdjetti naqtylaý kezinde qosymsha 20 mıllıard teńge bólýdi eskerýdi; ekinshi, ásirese, aýyldyq jerlerde shaǵyn nesıe berý úshin qarajatty odan ári bólý boıynsha usynystar engizýdi tapsyrǵan.

Iaǵnı aýyldy kórkeıtýge bılik basa nazar aýdardy. Bul bastamadan nátıje shyqsa, halyq jumys izdep qalaǵa sabylmaı, gúldengen aýylda sharýasyn dóńgeletip otyrar ma edi?!