Amnesty International uıymynyń deregine súıensek, byltyr álem boıynsha 993 adam ólim jazasyna kesilgen, al 2016 jylǵy kórsetkish 4 paıyzǵa tómen bolǵan.

Ólim jazasy álemniń 23 memleketinde tirkeldi. Kórsetkishtiń 84 paıyzy tórt memleketke tán. Olar: Iran, Saýd Arabıasy, Irak jáne Pákistan.  Al 21,9 myń adam ólim jazasynyń oryndalýyn kútip otyr.

Amnesty International deregine súıensek, Belarýsıa bıligi ólim jazasynan bas tartý nemes jazany jeńildetý sharalaryn oılamaıtyn sekildi. 2018 jyl bastalǵaly elde eki adam ólim jazasyna kesilip, tórt adam úkimniń oryndalýyn kútip otyr. «Belarýsıa Eýropa men Ortalyq Azıada ólim jazasyna kesý sharasy jalǵasyp kele jatqan sońǵy memleket», - delingen uıynyń baıandamasynda.

2017 jyly Gvıneıa men Mońǵolıa barlyq qylmys úshin ólim jazasyn alyp tastady. Bul joldy Kenıa da jalǵastyrdy. Býrkına-Faso men Chada da ólim jazasynan bas tartý týraly zań qabyldady.

Keı memleketter esirtkimen baılanysty qylmystardyń bárine ólim jazasyn qoldanady. Olar – Qytaı, Iran, Saýd Arabıasy jáne Sıngapýr. Malaızıa men Vetnamdaǵy ólim jazalaryn oryndaý sharalary qupıa túrde júrgiziletindikten esirtkige baılanysty jazany anyqtaý múmkin bolmady.

2017 jyly Sıngapýrda esirtkimen ustalǵan segiz adamdy darǵa asty. Saýd Arabıasynda da dál osyndaı kórsetkish baıqaldy.

Iranda 18 jasqa tolmaǵan bes adam ólim jazasyna kesildi, al 80 adam úkimniń oryndalýyn kútip otyr.

Amnesty International uıymy anyqtaǵandaı, adamdar óz kinálaryn qınaý, azaptaý arqyly moıyndaǵannan keıin olarǵa ólim jazasy úkimi taǵaıyndalyp otyrǵan.