«Kókjıek» yqshamaýdanyndaǵy órtten zardap shekken №31, №32 úılerdiń turǵyndary ákimdikke ókpeli. Osydan on kún buryn atalǵan úılerdiń mansardy órtengen bolatyn. Turǵyndardyń aıtýynsha, Almaty qalasy Jetisý aýdanynyń ákimdigi úılerdiń shatyry men syrtqy qabatyna jóndeý jumystary jaqynda bastalady dep ýáde bergen, alaıda sózinde turmaǵan. Ashynǵan halyq kesheden beri ákimdikpen sóılesýge tyrysqan, biraq ol áreketterinen eshqandaı nátıje shyqpady.

 №31 úıdiń turǵyny Dınar Kamılova jergilikti bıliktiń órtengen úılerdi qalpyna keltirýge asyqpaı otyrǵanyn aıtady.

— Órt bolǵan ýaqytta ákimdik: «Jóndeý jumystary bastalyp ketti, bitirip beremiz», — dedi. Eki aptaǵa jýyq ýaqyt ótti, úıdiń shatyry áli kúnge deıin jabylǵan joq. Bilte taqtaıshalaryn ǵana qaǵyp qoıǵan. Sońǵy kúnderi tolassyz jaýǵan jańbyrdyń saldarynan 6-qabattan aqqan sý birinshi qabatqa deıin jetip, dálizdi, páterlerdi sý basty. Sonyń saldarynan elektrıkter tokty óshirýge májbúr boldy, — deıdi D. Kamılova.

Turǵyndardyń sózinshe, arnaıy birneshe brıgada jumylmasa, jumys ónbeıdi. Biraq aınaldyrǵan 5-6 qurylysshy úıdiń ár jerin bir túrtip qoıyp, sonyń kesirinen saldyr-salaqtyqqa jol berilip jatyr eken.

«Kókjıek» aýdanynyń №31, №32 úıleriniń turǵyndary jańbyr sýy páterler men dálizderge kirip, altynshy qabatta bireý dáretke otyrsa, sýmen birinshi qabatqa deıin aǵyp keletinin, saldarynan jaǵymsyz ıis shyǵatynyn jetkizdi.

— Úıdiń shatyry jabylǵan jaǵdaıda órtenbegen úılerdi jańbyr sýynan aman alyp qalýǵa bolar edi, — deıdi turǵyndar.

Qazgıdromettiń málimetine súıensek, aldaǵy kúnderi Almatyda aýa raıy jańbyrly bolmaq. Al kóp qabatty úılerdiń shatyry áli de jabylmady. Ipotekaǵa alǵan úıleri taǵy da nóserdiń astynda qalyp, turǵyndar odan da kóp shyǵynǵa batpaq pa? Shatyrdy ýaqytyly jóndemegendikten zardap shegip otyrǵan halyq ótemaqyny kim tóleıdi dep qınalyp otyr.

Zańger Qaırat Júkeldiń pikirinshe, ıpotekaǵa alynǵan úı áli memlekettiń menshiginde tursa, jeke páter kooperatıvine ótpese, jańbyr sýynan zardap shekken turǵyndarǵa ótemaqyny ákimdik berýi qajet.

№31 úıdiń turǵyny Láıla Dúkenovanyń úıi tolyq órtenip ketken. Qazir otbasymen páter jaldap turyp jatyr. Ákimdik bir aıǵa páteraqy retinde 60 myń teńge bergen.

— Ákimdik, qujattary rásimdelse, 100 AEK (240 myń teńge) kómek kórsetiletinin aıtqan. Ol qarjyǵa tolyq jóndeý jumystaryn júrgizý múmkin emes. Men balkonymnyń ózin 400 myń teńgege jasatqanmyn. Bilmeımin... Ákimdik eń aldymen múgedekterge, kóp balaly otbasylarǵa kómektesemiz deıdi. Eń aldymen úı shatyryn jaýyp, odan keıin múmkin bolsa kómektesetinin málimdedi. Biraq eki apta ótti, eshqandaı qozǵalys joq. Úıdiń shatyry áli jabylmady, — deıdi Láıla Dúkenova.

Turǵyndar jınalyp, Almaty qalasy ákiminiń orynbasarymen kezdesýge barǵan. Onda úıdiń shatyryn tezdetip jabý máselesin kótermek bolǵan. Biraq ákimdiktegiler turǵyndardy úıge qatysty barlyq máseleni Jetisý ákimdigi sheshetinin aıtyp, shyǵaryp salypty.

Qamshy.kz aqparat agenttigi mán-jaıdy anyqtaý úshin Almaty qalasy Jetisý ákimdigine habarlasty. Ákimdik ókili resmı hat jazýymyzdy surady. Aldaǵy ýaqytta kelgen resmı jaýapty jarıalaıtyn bolamyz.

Aıta keteıik, «Kókjıek» yqshamaýdanyndaǵy №31, №32 kóp qabatty úıler 10 kún buryn órtengen edi. Úıdiń mansard úlgisindegi 6-qabaty túgel otqa oranǵan. Páter ıeleri baspanalaryn ıpotekaǵa alǵan.

Beıresmı derekterge sáıkes, órt kishkentaı balalardyń balkonda atqyshtardy atýynan tutanǵan. Qazir basqa da sebepteri tekserilip jatyr.