Almatydaǵy Úlken aınalma joldyń qurylys-montaj jumystary bıyl mamyr aıynda bastalady. Bul týraly búgin Úkimet otyrysynda Investısıalar jáne damý mınıstri Jeńis Qasymbek málimdedi. Onyń aıtýynsha, tas jol 2021 jyly aıaqtalady. Sonymen qatar, elimizde respýblıkalyq mańyzy bar 15 myń shaqyrym kúre joldy aqyly etý kózdelgen.
Úkimet jıyny búgin ádettegideı baıandamadan bastalǵan joq. Baqytjan Saǵyntaev aldymen Elbasy jarlyǵymen jańadan taǵaıyndylǵan Din isteri jáne azamattyq qoǵam mınıstri Darhan Qaletaevpen tanystyrýdy qup kórdi. Darhan Amanuly osy ýaqytqa deıin Qazaqstan Respýblıkasy Parlamenti Senatynyń depýtaty qyzmetin atqardy.
«Darhan Amanuly Elbasynyń jarlyǵy boıynsha Din isteri jáne azamattyq qoǵam mınıstri bolyp taǵaıyndaldy. Darhan Amantaıuly sizdi jańa qyzmetińizben quttyqtaı otyryp, jańa jumysyńyzǵa sáttilik tileımiz», - dedi QR Premer-mınıstri Baqytjan Saǵyntaev.
Budan keıin baıandamasyn birinshi bastaǵan Investısıalar jáne damý mınıstri jańa jobalardy jipke tizdi. Jeńis Qasymbek respýblıkalyq mańyzy bar joldardyń 15 myń shaqyrymy 3 jyl kóleminde aqyly bolady dedi. Jalpy quny 97,5 mldr teńgeni quraıtyn joba memlekettik-jekemenshik seriktestik aıasynda iske aspaq. Sonymen qatar, mınıstr Almatydaǵy qurylysy turalap turǵan Úlken aınalma tas jolyn sóz etti. Magıstraldyń qurylys-montaj jumystary bıyl mamyr aıynda bastalyp, 2021 jyly aıaqtalady.
«Bıyl 7 aqpanda «Alsım Alarko - Makıol - SK - Koreıan Ekspress Veı» men Qazaqstanda avtojol salasynda birinshi iri konsesıalyq jobany iske asyrý boıynsha kelisim- shartqa qol qoıyldy. Búgingi tańda konsorsıým baıyndyq jumystaryna kirisip ketti. Bıyl mamyr aıynda qurylys jumystary bastalady», - dedi Investısıalar jáne damý mınıstri Jeńis Qasymbek.
Premer-mınıstr stýdentterge jataqhana salý máselesin taǵy kóterip, qurylys «memlekettik-jekemenshik seriktestik» aıasynda iske asý kerek ekenin aıtty. Biraq jeke bızneske salmaq túspeý qajet dedi. Bul máseleni Saǵyntaev óziniń orynbasarlaryna tapsyrdy.
«Erbolat Asqarbekuly negizgi problemalardy birlese otyra qarap, sheshim qabyldaý qajet. Berdybek Mashbekuly keshede aıtyp ótti, búginde aıtty bizdiń qabyldanǵan sheshimderdiń turaqty bolýyna, normatıvterdiń bolmasa, belgilengen tarıfterdiń. Árıne, bul durys emes. Biz kásipterlerdi shaqyramyz. Jumysqa tartamyz, artynan tarıfterdiń barlyǵyn ózgertip jatamyz. Iaǵnı, ony bir jyl jumysyn bastamaı jatyp, ary qaraı bankrottyqqa ıtermeleıdi degen sóz», - dedi QR Premer-mınıstri Baqytjan Saǵyntaev.
Úkimet basshysyn alańdatqan kezekti másele, mektepterdegi keń jolaqty ǵalamtor. Onyń sózinshe, eshbir aımaq áli tolyqqandy Wi-Fi jelisine qosylmaǵan.
«Qazaqstan boıynsha birde-bir oblysta 100 paıyz qamtamasyz etilmegen. Baıandamada kórsetilgendeı. Almaty, Astana qalalarynda da. Aqmola oblysy -29 paıyz. Jambyl oblysy - 22 paıyz. Ońtústik Qazaqstan oblysy - 38 paıyz. Qyzylorda oblysy- 40 paıyz. Eń joǵarǵy kórsetkish 82 paıyz - Atyraý oblysynda. Jyl sońyna deıin bul sharýa sheshimin tabady degen oıdamyn», - dedi QR Premer-mınıstri Baqytjan Saǵyntaev.
Osy tusta Bilim jáne ǵylym mınıstri Erlan Saǵadıev «Sıfrlyq Qazaqstan» baǵdarlamasy aıasynda qolǵa alynǵan jańa blokcheınniń utymdy tustarymen bólisti. Bas muǵalim bul júıe bilim salasyndaǵy aqparattyń qoljetimdiligin arttyrady dedi. Oqýǵa túsý, bólingen grant, kásibı deńgeıdi kóteretin oqý kýrstary,balabaqshaǵa turǵan tizimdi baqylaý syndy málimetterdegi ózgeristerdi ár adam qadaǵalap otyra alady eken.
