Almatydaǵy 24 kóshede úgitilip ketken beton jol jıektastary tolyqtaı aýystyrylmaq.
Almatyda 28 ýchaskede jol jóndeý jumystary bastalyp ketti. Jalpy bıyl qalada uzyndyǵy 155 shaqyrym bolatyn 157 kóshe ortasha jóndeýden ótedi. Sondaı-aq 24 kóshede úgitilip ketken beton jol jıektastary tolyqtaı aýystyrylyp, onyń aınalasy abattandyrylmaq. Ótken aptada merdiger mekemeler joldardy jóndeýdiń josparyn bekitken. Endi ár nysanda kompanıa dırektorynyń sýreti, jumysqa tehnıkalyq baqylaý jasaıtyn jáne aıaqtalý merzimin qadaǵlaıtyn uıymnyń nómirleri kórsetilgen qujat ornatylady.
Bıylǵy jyly jóndeletin ár kóshe boıynsha aqaý aktisi jasalady. Alynyp qalǵan jol jıektastar, trotýarlar men pandýstar qaıta qoldanylady. Iaǵnı, jóndeý jumystary qarastyrylmaǵan kósheler úshin paıdalanylmaq. Al buqara barlyq jolǵa qatysty aqparatty «Open Almaty» qoǵamdyq portalynan alýyna bolady.
«Qazirgi kezde, mysaly, bizde 24 kóshede betondy bordúrlar tolyǵymen aýystyrylady. Solardyń arasynan jaramdylyǵy tańdalynyp alynyp, tehqadaǵalaýmen akt jasalyp, olar aýdandyq ákimdikke, Naýryzbaı aýdany men Alataý aýdanynyń ákimdikterine paıdalanýǵa beriledi. Aǵymdaǵy jóndeý jumystarynda paıdalanady. Bul bordúrlardy», - dedi Almaty qalasy Jolaýshylar kóligi jáne avtomobıl joldary basqarmasy basshysynyń orynbasary Saǵyndyq Telibaev.
Al mamandar jóndeýden ótetin kósheler tizimi jaıly aqparat halyqqa barynsha qoljetimdi bolady deıdi. Sondaı-aq almatylyqtardan ýaqytsha qolaısyzdyq týdyrǵandaryna túsinistikpen qaraýdy ótinedi. Biraq ýaqytsha kólik qozǵalysy toqtatylatyn kósheler boıynsha aldyn ala eskertilmek.
«Myna ortasha jóndeý jumystary júrgizilý barysynda tek qana jol jabyndysy ǵana aýystyrylyp qoımaı, sonymen qatar, jaramsyz jaǵdaıda aryq naýalary, sonymen jaıaý júrginshilerge arnalǵan joldar tolyǵymen jasalady. Sonymen qatar, kóshe aımaǵyndaǵy abattandyrý jumystary tolyǵymen jasalatyn bolady. Ortasha jóndeý kezinde kóshelerdi jappaýǵa tyrysamyz. Biraq asfált beton jabyndysyn salý kezinde 1 kún, 2 kúnge kóshe jabylatyn bolady», - dedi Almaty qalasy Jolaýshylar kóligi jáne avtomobıl joldary basqarmasy basshysynyń orynbasary Saǵyndyq Telibaev.
Almatydaǵy Gagarın, Jarokov, Sadykov, Iassaýı, Baıtursynov, Maqataev kóshelerindegi jol jıektastary tózimdi granıtke aýystyrylady. Óıtkeni, bul materıal tez úgiletin betonǵa qaraǵanda óte tózimdi keledi eken. Al myna ýchaskeden bordúrdyń ázirge tek 10 paıyzy ǵana jaramdy bolyp shyqqan. Ony merdiger mekeme jınap, saqtaýǵa tapsyrady.
«Biz 2 shaqyrym 80 metr shaqyrym bolatyn joldy jóndeýdi aldyq. Ál-Farabı kóshesinen bastap, Asqarov kóshesinen aıaqtalady. Osyǵan deıin betonnan jasalǵan jıektas bolǵan. Ony granıtke aýystyryp jatyrmyz. Asfált jabynyn da aýystyramyz. 26 naýryz kúni bastadyq, kelisim-shart boıynsha 15 mamyr kúni aıaqtaýymyz kerek. 3 jylǵa beretin kepildigimiz bar», - dedi merdiger mekeme basshysynyń orynbasary Iýrıı Cha.
Aıta keteıik, qala basshysy halyqqa qolaıly bolý úshin jumysty barynsha sapaly ári qysqa merzimde aıaqtaýdy tapsyrdy. Qazirdiń ózinde merdiger mekemeler arnaıy qorshaýdy alyp, ár obektide jumys atqaratyn qujat ornatyp úlgergen. Naqty jumys kestesi bekitilip, 157 kósheniń 80 paıyzy 25 tamyzǵa deıin, qalǵan 20 paıyzy qyrkúıektiń aıaǵyna deıin aıaqtalady dep josparlanyp otyr.
