Almatynyń aýasyn lastap kelgen kásiporyndar 78 mln teńge aıyppul tóledi.
Almaty - las qalalardyń qatarynan emes. Ekologtar bul túsiniktiń jańsaq ekendigin jetkizdi. Mundaı aqparattardy joqqa shyǵaryp sharshaǵan sala mamandary onyń qaıdan shyǵatynyn bilmeı dal. Aıtýlarynsha, aýanyń lastaný deńgeıi ótken jyldarmen salystyrǵanda edáýir tómendegen.
Qalanyń bas ekology keı aqparat quraldarynyń Almatyǵa nelikten «las qala» degen ataý bergenin túsinbeıdi eken. Al resmı derek basqasha. Atmosferaǵa bólinetin zıandy zattar edáýir tómendegen. Biraq bul sala baqylaýdy qajet etedi. 2 jyl kóleminde mamandar júzden astam tekseris uıymdastyrypty. Saldarynan aýany lastap kelgen kásiporyndar memleketke 78 mıllıon teńge aıyppul tólegen.
«Tekseris barysynda aýany shamadan tys lastap kelgen kásiporyndar anyqtaldy, ıaǵnı 13 derek tirkeldi. Sonymen qatar, 45 óndiris orny qorshaǵan ortada jumys isteý ruqsatyn almaǵan. Nátıjesinde olarǵa aıyppul salynyp, shyǵyn kólemin óteý mindetteldi», - dedi Almaty qalasy Ekologıa departamentiniń basshysy Orman Aqqozıev.
Elimizdegi aýa raıynyń boljamyn jasaıtyn basty mekeme mamandarynyń sózinshe, qolaısyz aýa raıy saldarynan aqpan aıynda aýa kóp lastanypty.
«Qańtar aıynda kúnniń sýyq bolýy saldarynan aýa lastanýynyń kórsetkishi jaqsy boldy. Al aqpanda kúnniń kúrt jylynýy esebinen belgilengen mejeden asyp tústi. Naýryz aıynda mundaı teris kórsetkishter baıqalmaıdy», - dedi «Qazgıdromet» RMK Almaty qalasy boıynsha fılıalynyń hımıalyq-saraptamalyq taldaý bóliminiń basshysy Láılá ÁDİLOVA.
Aýany lastaıtyn óndiris oryndaryn kógildir otynǵa almastyrý máselesi de óz sheshimin taýyp keledi. Oǵan dálel Almatydaǵy 1-shi jylý elektr stansıasy. Bul kásiporyn 2016 jyldan beri gazben jumys istep keledi.
«2016 jyly ákimdik pen Energetıka mınıstrligi memorandým, sheshim arqasynda JES-1 tek gazben jumys isteıtin boldy», - dedi Almaty qalasy JES-1 basqarýshy dırektory Ǵalym Jańbyrshy.
Jospardan tys tekserý odan ári jalǵasyn tappaq. Ekologtardyń aıtýynsha, ol turǵyndardyń jasaǵan shaǵymy esebinen júrgiziledi. Aýanyń tazalyǵyn ǵana emes, sýdyń jáne topyraqtyń da quramyn qalt jibermeımiz dep otyr.
