Elbasy jańa zamanǵa saı bolý úshin Tórtinshi ónerkásiptik revolúsıa jaǵdaıyndaǵy tarıhı órleý  bastaýynda turǵan  birtutas ult bolýymyz úshin 10 baǵytty aıqyndap bergen edi. «Jemqorlyqpen kúres  jáne zańnyń ústemdigi» atty toǵyzynshy baǵytynda jemqorlyqtyń aldyn alýǵa baǵyttalǵan kúrestiń jalǵasy beretinin aıtty. Soǵan oraı  «Nur Otan» partıasy Batys Qazaqstan  oblystyq fılıaly janyndaǵy sybaılas jemqorlyqqa qarsy is-qımyl jónindegi qoǵamdyq keńestiń otyrysy ótken bolatyn.

Basqosýda BQO ádilet departamenti basshysynyń mindetin atqarýshy Hamıdolla Qusdáýletov oblystaǵy ádilet qurylymdarynda 2015-2017 jyldar ishinde jemqorlyqqa qarsy áreket etý jumystary týraly baıandady. Onyń aıtýynsha, ótken jyly oblystaǵy ádilet qurylymdaryna jeke jáne zańdy tulǵalardan 149 shaǵym túsken. Barlyq ótinish pen aryzdar zańmen bekitilgen merzim ishinde qaralǵan. Memlekettik qyzmetterdiń sapaly ári ýaqtyly kórsetilýine          turaqty túrde monıtorıń júrgizilip otyrady.

Májiliste sondaı-aq «Nur Otan» partıasy Shyńǵyrlaý aýdandyq fılıalynda partıanyń «Sybaılas jemqorlyqqa qarsy is-qımyldyń 2015-2025 jyldarǵa arnalǵan baǵdarlamasynyń» oryndalý barysy týraly aýdan ákimi, fılıal tóraǵasy Albert Esalıev baıandady.

– «Sıfrlyq Qazaqstan» baǵdarlamasy sheńberinde aýdannyń segiz aýyldyq okrýginde turǵyndardyń óz-ózine qyzmet kórsetý ortalyqtary ashyldy. Bul jumys eń aldymen elektrondy qyzmet sanynyń jáne aýyl halqynyń kompúterlik saýattylyǵynyń artýyna baǵyttalyp otyr. Degenmen keıbir qyzmet kórsetý oryndarynda qıyndyqtar týyndap otyr. Buǵan sebep – ınternet jelisi jyldamdyǵynyń nasharlyǵy. Bul máseleni sheshý úshin tıisti qurylymdyq mekemelerge usynystar engizilýde, – dedi ol.

Basqosýda turǵyndar tarapynan jeke sot oryndaýshylardyń jumysyna kóp syn aıtylatyny, qojalyq ornalasqan jer telimin óz atyna, ne týysyna aýdarýda keıbir adamdardyń qıyndyqtarǵa kezigip jatatyny keń talqylandy. Qazirgi aqparattyq tehnologıa damyǵan kezeńde aýdandyq ádilet basqarmasy saıtynyń iske qosylmaýy da synǵa alyndy.