Elbasy Nursultan Ábishuly «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri»   Joldaýynda qatty turmystyq qaldyqtardy kádege jaratý qajettigine toqtalǵan edi.  Turmystyq qaldyqtardy kádege jaratýǵa bolatynyn Batys Qazaqstan oblysyndaǵy Tasqala aýdanynyń turǵyny Qanat Býentaev dáleldep bergendeı boldy. Ol nebári on kúnniń ishinde kóliktiń jaramsyz dóńgelekterinen uzyndyǵy - 8, eni 6 metr bolatyn tórt túlikke arnalǵan  qora turǵyzdy.

          – Qazir qaltanyń qalyńdyǵyna kelip tireletin zaman ǵoı. Tyǵyryqtan qalaı shyǵý kerek dep oılanasyń? Birinshiden, jaramsyz dóńgelekterdi iske jarataıyn dep qurylys jumysyna kirise kettim. Ekinshiden, rezınany órteý ekologıaǵa zalal. Qorany tájirıbe júzinde synamaq bolyp, salyp kórdim. Qystan oıdaǵydaı shyqtyq, endi garaj salý oıda bar. Ár dońǵalaq ishin topyraq qoqys qaldyqtarymen toltyrdym. Qurylysqa 700-ge jýyq rezına jumsaldy. Onyń ózin úsh aıdaı jınadym, – degen Qanat Ábilulynyń bolashaqta qorasyn tórt túlikke toltyryp, sharýashylyqpen aınalyssam degen nıeti bar. Qanat jary ekeýi eki qyz ben eki ul tárbıelep otyr. Ákeleri qolǵa alǵan iske balalary da qolǵabys etedi. Qysta jyly, jazda salqyn qoraǵa qaqpaqtardy kósheden, kúl-qoqystardan jınapty. Eńbekqor azamat oǵan bir tıyn da aqsha jumsamaǵan. Tek eski rezınalardy bir-birine bekitý úshin arnaıy shegelerdi 3000 teńgege satyp alǵan. Endi esik pen terezeni ornatý ǵana qalypty.

«Eńbek eptilikti súıedi» demekshi, eńbekqorlyǵy men eptiliginiń arqasynda Qanat birneshe jyl buryn aýlasyn jeńil kóliktiń qańqalarymen qorshap alǵan. Eki jumada turǵyzylǵan aýlaǵa 43 kóliktiń qańqasy ketken.

          -Negizi, muny bir kınodan kórip, nege jasap kórmeske degen oı keldi. Jaramsyz temir tulpardyń qańqasy da kádege asty, qoqys ta azaıdy. Úıdiń aınalasynda 20 shaqty bala bar. Olarǵa, árıne, oıyn alańy qajet. Arnaıy jer bolsa, alań salý josparda bar. Úıimniń janynda bos jatqan jerdiń paıdalanylmaǵanyna birneshe jyldyń júzi boldy. Eger sol jerdi maǵan berse, jaramsyz jabdyqtardan salynǵan oıyn alańy kózdiń jaýyn alyp turar edi, – deıdi keıipkerimiz.