Bıyl BQO-daǵy aýyl sharýashylyǵy daqyldary egistiginiń jalpy aýmaǵy 513,5 myń gektardy quraıdy. Ótken jyly egistik aýmaǵy 491,4 myń gektar shamasynda bolǵan. Oblystyq aýyl sharýashylyǵy basqarmasy basshysynyń orynbasary Satqan Ómirzaqovtyń aıtýynsha, egin sharýashylyǵymen aınalysatyn sharýashylyqtar sońǵy jyldary dándi jáne maıly daqyldar ósirýge mán berýde. Osy oraıda Elbasy bıylǵy Joldaýynda agrarlyq saıasattyń eńbek ónimdiligin túbegeıli arttyrýǵa jáne óńdelgen ónimniń eksportyn ulǵaıtý qajettigin aıtqan bolatyn.
– Oblys tuqymmen tolyq qamtylǵan. Jazdyq dándi daqyldar tuqymyna degen qajettilik 20 myń 770 tonna bolsa, qolda bary – 22 myń 150 tonna. Óńirde joǵary reprodýksıaly tuqym óndirisimen bir elıtalyq jáne bes tuqym sharýashylyǵy aınalysady. Tuqym sharýashylyqtarymen 6,8 myń tonna tuqym óndirilip, 3,5 myń tonna joǵary sapaly, aýdandastyrylǵan dándi daqyldar tuqymy sattyqqa daıyndalǵan. Onyń shinde jazdyq bıdaı tuqymy 2800 tonnany, arpa 428 tonnany, suly 63 tonnany quraıdy. Sharýalar jetpeıtin tuqymdy tuqym sharýashylyqtarynan satyp ala alady, – dedi Satqan Erjanuly. Mysalǵa, óńirdegi jalǵyz elıtalyq tuqym sharýashylyǵy «Oral aýyl sharýashylyǵy tájirıbe stansasy» JSHS 209 tonna «Volgoýralskaıa» surypty bıdaıdyń elıtalyq tuqymyn, 424 tonna «Volgoýralskaıa» surypty 1-reprodýksıaly bıdaı, 50 tonna «Doneskıı-8» surypty elıtalyq arpa, 229 tonna «Doneskıı-8» surypty 1-reprodýksıaly jáne 140 tonna 2, 3-reprodýksıaly arpa tuqymdaryn sattyqqa usynady. Sondaı-aq «Tulpar LTD» JSHS 200 tonna «Volgoýralskaıa» surypty 1-reprodýksıaly, 300 tonna «Saratovskaıa-42» surypty 2-reprodýksıaly, «Razdole» JSHS 1461 tonna «Albıdým-32» surypty 1-reprodýksıaly bıdaı tuqymdaryn sharýalarǵa tıimdi baǵamen usynady. Eginmen aınalysatyn sharýashylyqtardyń maıly daqyldar tuqymyna degen qajettiligi 500 tonnany quraıdy. Búginde sharýashylyqtar 725 tonna (145%) maıly daqyldar tuqymyn daıyndaǵan.
Bıylǵy jylǵa oblysqa tuqym sharýashylyǵyn damytýdy sýbsıdıalaý baǵdarlamasy boıynsha 192,4 mln. teńge bólindi. Atalmysh qarjylyq qoldaý taýar óndirýshilerdiń, elıtalyq jáne ózge de tuqym sharýashylyqtarynyń suryptardy jańalaý, elıtalyq 1- reprodýksıaly jáne gıbrıdti tuqymdardy satyp alý shyǵyndaryn ishinara arzandatýǵa baǵyttalǵan. Bul baǵdarlama aýdandastyrylǵan tuqym suryptaryn satyp alý shyǵyndarynyń 70%-yn jáne aýyl sharýashylyǵy daqyldarynyń aýdandastyrylmaǵan suryptaryn satyp alý shyǵyndarynyń 30%-yn sýbsıdıalaýdy kózdeıdi.
Bıyl oblystaǵy 622 sharýashylyq qurylymy egin egýge qam jasaýda. Kóktemgi dalalyq jumystarǵa 4215 traktor, 4965 dánsepkish, 811 qopsytqysh jáne «Djon Dır», «Fleksıkoıl», «Keıs»,«Horsh» markaly joǵary ónimdi 47 egis kesheni qatysady. Óńirdegi kóktemgi dalalyq jumystardy júrgizýge 12 myń tonna dızel otyny bólindi. Sáýir aıyna 5 myń tonna, mamyr aıyna 7 myń tonna janar-jaǵarmaı jetkiziletin boldy.
