Oblystyq mádenıet jáne tilderdi damytý basqarmasy, oblystyq mádenıet jáne halyq shyǵarmashylyǵy ortalyǵynyń uıymdastyrýymen "Nurly jol - bolashaqqa bastar jol" oblystyq óner festıvali Túlkibas aýdanynda ótti.
Aýdandyq, aýyldyq ákimdik qyzmetkerleri, ardagerler keńesi jáne ájeler keńesiniń tóraǵalary men tóraıymdary, mádenıet salasy qyzmetkerleri men buqaralyq aqparat quraldary festıvál qonaqtaryn aýdan shekarasynan kútip alyp, aımaqtyń tynys-tirshiligi jóninde áńgimelep, kıeli, tarıhı mańyzy jóninde málimdedi.
Shara Keltemashat aýyl okrýginde Túlkibas aýdandyq ardagerler keńesiniń tóraǵasy Ońlasyn Qulbekovtiń tórt jyldan beri 200-den asa jádigerdi óz qolymen jınaqtaǵan "Aýyl tarıhy" murajaıymen tanysýdan bastaý aldy. Aýdanyndaǵy kıeli, tarıhı jerlerdi nasıhattaýǵa arnalǵan "Mádenı mura" baǵdarlamasy aıasynda Qazaqstannyń kıeli jerleri tizimine engen "Tamshy" áýlıege quran baǵyshtalyp, qarıalar taý men sý shejiresinen syr shertti. Aımaqtyń aıshyqty atyn barshaǵa tanytyp, sulýlyq pen ádemiliktiń sımvolyna aınalǵan Shubaıqyzyl shoqysyndaǵy qyzyl kilem qyzǵaldaqtar alqaby da nazardan tys qalmady.
Festıvál aıasynda aýdandaǵy mádenıet úıleri men klýb mekemeleriniń halyq shyǵarmashylyǵyn damytý maqsatynda atqarylǵan jumystary, eldimekeniń tarıhy men geografıalyq ereksheligin kórsetetin stend kórmeler tanystyrylyp, aýdan ónerpazdarynyń fleshmoby men ulttyq oıyndary jáne gala-konsertke jalǵasty.
"Nurly jol-bolashaqqa bastar jol" oblystyq óner festıvali baspasóz konferensıasymen qorytyndylandy. Basqosýǵa M.Áýezov atyndaǵy OQMÝ-niń aǵa oqytýshysy, qazylar alqasynyń tóraıymy Jumabaı Láıla Jumabekqyzy, qazylar alqasynyń músheleri Kompozıtor, Qazaqstan Kompozıtorlar Odaǵynyń múshesi, OQO Kompozıtorlar qaýymdastyǵynyń tóraıymy Sátmuhambetova Quralaı Shaızadaqyzy, «Qazaqstan» Ulttyq arnasynyń «Elden habar» jáne «Ontustik» telearnasynyń «El men jer» baǵdarlamalarynyń redaktory, QR Mádenıet qaıratkeri Atabek Muhtar Oryntaıuly, Oblystyq mádenıet jáne halyq shyǵarmashylyǵy ortalyǵynyń Halyq shyǵarmashylyǵy bóliminiń meńgerýshisi Nurmaǵambetov Muratbaı Qýantqanuly, Oblystyq mádenıet jáne halyq shyǵarmashylyǵy ortalyǵynyń redaktory Aıtpenbetova Madına Jumabaıqyzy jáne aýdandyq mádenıet jáne tilderdi damytý bólimi qyzmetkerleri men mádenıet úıi, klýb mekemeleriniń meńgerýshileri, zıaly qaýym jáne buqaralyq aqparat quraldary qatysty.
Otyrys barysynda festıváldi uıymdastyrý men senarılik qurylymy, sahna mádenıeti, úıirme jumystaryn jandandyrý jáne olarǵa qoldaý kórsetý syndy kóptegen máseleler ortaǵa salyndy.
Túlkibas aýdanyndaǵy mádenıet jáne tilderdi damytý bólimine qarasty mekemeler jyl basynan beri 1555 is-shara ótkizse, onyń birqatary "Rýhanı jańǵyrý" baǵdarlamasyn nasıhattaýǵa arnalǵan. Aýdan kóleminde 10 mádenıet úıi, 19 aýyldyq klýb jumys jasaıdy. Jas daryndardy halyq shyǵarmashylyǵyna baýlý, shyńdaý maqsatynda 72 úıirmede 732 qatysýshy bar. Sondaı-aq, aǵymdaǵy jyly 7 aýyldyq klýb dybys kúsheıtkish aparatýrasymen jabdyqtalǵan.
