Ońtústik Qazaqstan oblysy Otyrar aýdanynda azamattardy kásipkerlikke tartý maqsatynda 45 adamǵa 180 mln teńge kóleminde nesıe berilgen. Nátıjesinde mal sharýashylyǵy men qyzmet kórsetý salalarynda 50-ge jýyq jańa jumys orny ashylǵan.

OQO ákiminiń baspasóz qyzmeti uıymdastyrǵan pres-týr kezinde jýrnalıser osyndaı birqatar nysandardy aralap, jumysymen tanysty, dep habarlaıdy Qamshy.kz aqparat agenttigi.

E.Qultaev memlekettik baǵdarlamasy aıasynda jeke kásibin ashqan jannyń biri. Ol 5 jyl merzimge 7 mln teńge nesıe alyp, «Aǵysaı» tigin sheberhanasyn ashqan. Búginde qaramaǵynda 4 jumyskeri bar.

Sondaı-aq, aýdanda kásipkerlerdiń demeýimen balalardy balabaqshamen qamtý máselesi de ońtaıly sheshimin taýyp keledi. Memlekettik-jekemenshik áriptestik aıasynda boı kótergen L.Jabataevanyń «Keldibek ata» balabaqshasy osynyń dáleli. Zamanaýı qural-jabdyqpen qamtylǵan bóbekjaı 100 orynǵa shaqtalǵan. Búginde onda 23 jergilikti turǵyn turaqty jumyspen qamtylǵan. Jalpy aýdanda mundaı 6 balabaqsha jumys istep tur.

Munan soń tilshiler «Úıde áleýmettik qyzmet kórsetý» mekemesi janynan ashylǵan «Kúndizgi qatynaý bólmesine» aıaldady. Múmkindigi shekteýli balalar kútimine arnalǵan mekemege 89 búldirshin esepke alynǵan. Onyń 62-si tirek-qımyl apparaty buzylsa, 17 balanyń psıhonevrologıalyq aýytqýy bar. Qazirgi tańda zamanaýı qural-jabdyqtarmen jabdyqtalǵan úıde 22 bala 2 aýysymda áleýmettik qyzmet alýda.

BAQ ókilderi Sháýildir aýyl okrýgindegi Arys ózeni jaǵalaýyn abattandyrý jumystarymen de tanysty. Mundaǵy qurylys jumystary 2017 jyly bastalyp, 2018 jyly aıaqtalady dep josparlanýda. Aýdan basshysy bul jumystar ózen jaǵalaýyn kóriktendirý jáne turǵyndardyń qaýipsizdigi úshin jasalyp jatqanyn jetkizdi.

Otyrar agrarly aýdan bolǵanymen, ondaǵy topyraqtyń sorlanýy, aýa raıynyń qolaısyzdyǵy sharýalardy ábigerge salyp keldi. Osy máseleniń aldyn-alý úshin aýdan ákimi E.Aıtahanovtyń bastamasymen Ó.Ospanov atyndaǵy Qazaq topyraqtaný jáne agrohımıa ınstıtýty ǵalymdarymen birlesip, ǵylymmen ushtastyryp egin egý jumystaryn júrgizý qolǵa alyndy. Nátıjesinde sharýalar ónim kólemin arttyryp, tájirıbeniń tıimdiligine kóz jetkizdi. Qazirgi tańda aýdandaǵy 3 myń gektar jerge topyraqty zertteý jumystary júrip jatyr.

Tarıh pen shejirege baı aýdanǵa qyzyǵýshylyq tanytyp keletin týrıserdiń sany jyl saıyn artyp keledi. Sondyqtan óńirdegi týrısik klasterdi damytý mańyzdy máselelerdiń biri bolyp otyr. Jýrnalıser aýdanymyzǵa kelgen qonaqtarǵa jaǵdaı jasaý maqsatynda «Otyrar tóbe» qalashyǵy men «Arystanbab» kesenesi aralyǵyndaǵy jol boıyna salynatyn týrısik nysandarynyń jobasyn kórip, Otyrar memlekettik arheologıalyq qoryq-mýzeıine de at basyn burdy. Mýzeıdiń kórme zaly zamanaýı úlgide qaıta jabdyqtalyp, jańa jádigerlermen tolyqtyrylǵan bolatyn.