Naýryz toılap QazITÝ-dyń jalyndy bul jastary,
Án-bı arnap kórermenge izgi joldy bastady.
Kóterińki kóńil syılap, qurmetpenen barshaǵa
Ashyq bolsyn dep tileıdi elimizdiń aspany!
Bul jyr joldary Bostandyq aýdanynda oryn tepken Qazaqstan ınjenerlik-tehnologıalyq ýnıversıtetinde ótken Naýryz merekesinde jyr bolyp shashyldy. Bereke - birlikti, yntymaqty tirlikti, jaqsylyqty, meıir - shapaǵatty, keń peıildi, baq-berekeni, kóktemniń jylý shýaǵyn ózimen birge ala keletin Naýryz QazITÝ-da toılanyp, barshaǵa qýanysh pen mereke syılady. Kún men tún teńeletin, halyqtyń aýyzy aqqa tolatyn, maldyń aýyzy kókke keneletin shaqta toılanatyn merekeni QazITÝ ujymy sán-saltanatymen ótkizdi.
Aıtýly mereke ýnıversıtet basshylyǵy, oqytýshy-professorlar quramy, qyzmetkerler, Jastar Uıymdary Komıteti men stýdentterdiń bir kisideı at salysýymen joǵary deńgeıde ótti.
Merekege eńbek jáne soǵys ardagerleri, Akademqalashyqta ornalasqan barlyq ǵylymı-zertteý ınstıtýttarynyń ǵalymdary, Almaty qalasy Jastar saıasaty basqarmasy, Bostandyq aýdandyq ishki saıasat bólimi, «Rýhanı jańǵyrý» Almaty qalasynyń ofısiniń ókilderi, Almaty qalasynyń JOO jastarynyń basyn biriktirgen G-38 músheleri, «Zerde-QazITÝ» olımpıadasynyń júldegerleri, ata-analar, t.b. qonaqtar qatysýymen ótti.
Merekeniń shymyldyǵy ýnıversıtetimizidiń bıshi qyzdarynan quralǵan «Shabyt» bı tobynyń «Shashý» ásem bıimen ashyldy.
QR Prezıdenti N. Nazarbaevtyń «Bolashaqqa baǵdar: rýhanı jańǵyrý» baǵdarlamasyndaǵy baǵyttardy ózek etip Uly dala dástúrin, ulttyq rýhymyzdy jáne Astanamyzdyń 20 jyldyǵyn jurtshylyq nazaryna pash etýdi maqsat etken ónerli stýdentterdiń teatrlyq klýbynyń daıyndaǵan mýzykalyq sahnalanǵan qoıylymmen merekemiz jalǵasyn tapty. Ónerli stýdentter Kún men Túnniń teńelip, jer dúnıeniń jańarýyn beıneleıtin sahnalyq kórinisti kórsetip, Birjan Sal, Qyz Jibek, Tólegen, Shege sıaqty obrazdarǵa enip, Jer Ana men Qydyr Atanyń ystyq lebiz, batalaryn alyp, Táýelsiz Qazaqstanda erkin ósip kele jatqandaryn jetkizip, kórermenniń ystyq yqylasyna bólendi. Kolej stýdenttik parlamenti 100 stýdenttiń basyn biriktirip, uıymdasa bılegen qazaq bıi «Qara jorǵa» kelgen jurttyń delebesin qozdyryp, tamasha kóńil kúı syılady.
Qazaqstan ınjenerlik-tehnologıalyq ýnıversıtetiniń rektory, fızıka-matematıka ǵylymdarynyń doktory, profesor Temırbekov Nurlan Muqanuly jáne merekeniń qadirli qonaǵy Eki márte Keńester Odaǵynyń batyry, ushqysh, avıasıa generaly, qazaqtyń tekti qyrany Talǵat Bıgeldınovtyń úıindegi apamyz Oryndybıke apaı barsha jınalǵan jurtshylyqty Naýryz merekesimen quttyqtap, jyly lebizderin bildirdi.
Naýryz merekesi Respýblıkamyzdyń 11 aýmaǵyn qamtyp, 2300-den astam oqýshylardyń basyn qosqan «Zerde-QazITÝ – 2018» pándik olımpıadasynyń jeńimpazdaryn saltanatty túrde marpattaý rásimimen jalǵasyn tapty.
Qazaqstannyń ár oblysynan kelgen jeńimpaz mektep túlekteri marapattaldy. Naýryz merekesinde oqýshylar joǵary bilim alýǵa zor múmkindik týǵyzyp otyrǵan elimen maqtanatyndyqtaryn jetkizip, zor qýanyshqa bólendi.
Naýryz toıyna qonaq retinde ánnen shashýyn arqalaı kelgen Qazaqstan estardasynyń juldyzy, ánshi Jiger Aýypbaev jáne QazITÝ ónerli jastary jurtshylyq kóńilin ásem sazdy ánge, bıge bóledi. Eski oqý ǵımaratynyń alańynda ulttyq naqyshta kıiz úıler tigilip halqymyzdyń ulttyq buıymdary jáne kıimderimen bezendirildi.
Qonaqtar men oqytýshylarǵa, stýdentterge arnaıy jaıylǵan aq dastarhan basynda Naýryz kóje ishilip, ulttyq ánder shyrqaldy. Altybaqan teýip, shattyqtan júzeri jaınaǵan jastardyń kóńil –kúıi erekshe.
Sondaı aq «Arqan tartys», «Qol kúres», «Batpan kóterý» sıaqty qazaqtyń ulttyq oıyndarynan jarystar uıymdastyrylyp, jeńiske jetken stýdentter maqtaý qaǵazymen, syılyqtarmen marapattaldy.
