Jańaózen qalasy, Teńge aýylynda dostarymen qydyrýǵa shyqqan 16 jastaǵy jasóspirim tirideı órtenip kete jazdady. Onyń anasy, oqys oqıǵaǵa ulynyń dostaryn kinalaıdy, dep xabarlaıdy Qamshy.kz aqparat agenttigi QazAqparatqa silteme jasap.
Qazir zardap shekken Qojaxmet İlesbaev Mańǵystaý oblystyq aýrýxanasynyń jansaqtaý bóliminde jatyr.
Dárigerlerdiń aıtýynsha, denesiniń 52% kúıik shalǵan. Sondyqtan naýqasty sanıtarlyq avıasıamen Astanaǵa aparý qajet. Qazir soǵan baılanysty tergeý jumystar júrgizilip jatyr.
Anasynyń aıtýynsha, uly Qojaxmet oqys oqıǵa bolar kúni eki dosymen syrtqa shyǵyp ketken. Kenetten kórshiniń balasy júgirip kelip, jaısyz habardy jetkizgen. Órtke oranǵan balasynyń es-tússiz jatqanyn kórgen ol, esinen tanyp qala jazdaǵan. Shuǵyl jedel-járdem shaqyryp, bala Jańaózen qalasynyń aýrýxanasyna jetkiziledi.
«Qasyndaǵy balanyń aǵasy ony sý shashyp sóndirgen eken. Balamnyń beti, qoly, aıaǵy túgel kúıip qalǵan. Jaǵdaıy aýyr xalde. Tek apparatpen ómir súrip jatyr. Biraq azdap sóıleı alady. Ulymdy kim órtegenin, osyndaı xalge qalaı jetkenin bilgim keledi. Ótken joly palatasyna kirgenimde «ana balalar jasady» dep jylady», — deıdi anasy Balǵanym Omarova.
Ázirshe oqıǵanyń qalaı bolǵany belgisiz. Tek anasy dostaryn kináli dep sanaıdy. Sol kúni Qojaxmetti ertip ketip, ústine benzın shashyp, órtep jibergen degen kúdigi bar. Sondyqtan quqyq qorǵaý organdaryna aryz túsirgen.
«Dárigerler bala apparattan shyqsa, óletindigin aıtady. Qalaı qınalyp jatqanyn óz kózimmen kórdim. Qojaxmet úshinshi balam. Áli esimdi jıa almaı júrmin. Astanaǵa alyp keteıin desem, qarajat ta joq», — deıdi anasy.
Oblys ortalyǵynda 20 kúnnen astam jatqan Qojaxmettiń jaǵdaıy óte aýyr. Ol Jańaózennen 3 sáýir kúni jetkizilgen. Jergilikti dárigerler onyń jaǵdaıyn jaqsartý úshin barlyǵyn jasaǵan. Qazir kúıgen terini aýystyrýǵa qamdanyp jatyr.
Mańǵystaý oblystyq aýrýxanasynyń travmatologıa bóliminiń dárigeri Quralbek Esqalıevtiń aıtynsha, Qojaxmet İlesbaevtyń denesiniń 50-52 paıyzyn kúıik shalǵan. Onyń 47% tereń kúıik.
Oblystyq İİD-den málim etkendeı, oqıǵa boıynsha qylmystyq is qozǵaldy.
«Qazir bul is Jańaózen İshki ister basqarmasyna tirkeldi. QR QK-niń 114-baby, 3-bóligi boıynsha (Abaısyzda densaýlyqqa zıan keltirý) tekserý amaldary júrgizilýde. Jasóspirim aýrýhanadan shyqqannan soń sot saraptamasy taǵaıyndalatyn bolady», — deıdi oblystyq İİD Memlekettik til jáne aqparat bólimi bastyǵynyń mindetin atqarýshy Áıgerim Ibatýllaeva.
Tártip saqshylarynyń aıtýynsha, medısınalyq saraptama jasaý úshin zardap shegýshiniń jaǵdaıy jaqsarý kerek. Ázirshe, jansaqtaý bóliminde jatqan Qojaxmetti qozǵaýǵa bolmaıdy.
