Qazkom Oǵyz Doǵanǵa memlekettik tilde qyzmet kórsetpegeni úshin keshirim surap, vıdeoúndeý jarıalady dep jazady Qamshy.kz aqparat agenttigi.
Eske salsaq qyzý talqyǵa túsken oqıǵa Astana qalasynda "Saryarqa" bank bólimshesinde bolǵan. Osydan biraz ýaqyt buryn Eır Astanany qazaq tilinde qyzmet kórsetpegeni úshin sotqa berip, sotta jeńip shyqqan bolatyn.
Qazkom bankiniń qyzmetkerleri qazaq tilinde qyzmet kórsetýdi talap etken Oǵyz Doǵannyń sózin elemeı, ony memlekettik tilde qyzmet kórsetýden bas tartqan. Keıin osy oqıǵa áleýmettik jelde qyzý talqyǵa túsip, Oǵyz Doǵan atalǵan bank qyzmetkerlerge keshirim suraýdy talap etti.
Búgin banktiń tóraǵasy Ýlv Vokýrka halyqtan keshirim surady.
«Bank keshegi oqıǵa úshin barlyq qatysýshylar men kýágerden keshirim suraıdy.Til týraly zańǵa sáıkes, bank óz qyzmetin memlekettik tilde, ıaǵnı qazaq tilinde jáne resmı statýsy bar orys tilinde kórsetedi. Klıentterdiń suranysy boıynsha jáne Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasy boıynsha bank úsh tilde qyzmet kórsetýge daıyn», dedi bank basshylyǵy.
Sonymen birge Qazkom bankiniń basshylyǵy eki tilde qyzmet kórsetetin qyzmetkerlerdiń bar ekenin málimdedi. Onyń aıtýy boıynsha, klıentterge qyzmet kórsetetin barlyq menedjerler memlekettik tildi meńgergen. Alaıda qarjy mekemesi klıenttiń talabyn oryndamaı, orys tilinde ǵana sóılegen bank qyzmetkerleriniń áreketin aqtamaıtynyn aıtty.
«Keshe Astanadaǵy bólimshede bolǵan oqıǵa úshin sizderden keshirim suraımyz. Bul bólimshede bizdiń bankte qabyldanǵan klıentke qyzmet kórsetý erejesi saqtalmady. Bul oqıǵa biz úshin sabaq boldy. Biz óz tarapymyzdan tek Astana qalasyndaǵy emes basqa qalalardaǵy bólimshelerde qyzmet kórsetý sapasyn baqylap, jaqsartýǵa tyrysamyz», deıdi bank basshylyǵy.
