QR Bas prokýrory Qaırat Qojamjarovtyń nazaryna!
QR İshki ister mınıstri Qalmuhambet Qasymovtyń nazaryna!
QR Adam quqyqtary jónindegi Ýákil Asqar Shákirovtiń nazaryna!
Osydan birer kún buryn saıtymyzda seks-quldyqtan qashyp shyǵyp, bazardaǵy halyqtan kómek suraǵan qyzdyń vıdeolary jarıalanǵan edi. 5 mamyrda Almatydaǵy «Saıahat» avtobeketiniń mańynda bolǵan oqıǵa qoǵamda qatty talqylandy. Jábirlengen qyzdyń taǵdyryna alańdaýshylar kóbeıdi.
Qamshy.kz aqparat agenttigi mán-jaıdy bilý úshin jýrnalısik zertteý júrgizdi. İndetip izine túsip, eń aldymen Raýshandy qylmyskerlerden arashalap alǵan «Jeltoqsan-86» qoǵamdyq uıymynyń tóraıymy Gúlbahram Júnisovany taptyq (vıdeoda Raýshandy qushaqtap tur). Ol kisi bazarǵa keregin alýǵa baryp, oıda joqta qyzdyń qasynan tabylypty.
– Qazir men qyzdyń janynda aýrýhanada otyrmyn. Bul oqıǵa týrasynda prokýratýraǵa habarlap, másele kóterip jatyrmyn. Jaýapty organdarǵa osy shýly jaǵdaıdyń túbine jetpeı qoımaıtynymdy da jetkizdim. Bul qyzdy endi bir Alla ǵana meniń qolymnan alady. Ol jerde taǵy da ózbektiń, qyrǵyzdyń, qazaqtyń 20 shaqty qyzy bar. Raýshannyń aıtýynsha, prıtonnyń bireýi Seıffýlın men Varshavskaıa kósheleriniń qıylysyna taıaý, Dýlatov-17 meken-jaıynda ornalasqan. Úlken qonaqúı deıdi. Iesi Maral degen áıel eken. Al keshegi kelinshek buryn dál osyndaı qylmyspen ustalǵan. Qyrǵyzstandyq nómir taqqan kólik qashyp úlgerdi. Biz izdeý salyp, aryz berdik. Degenmen vıdeokameralarda qaıda baǵyt alǵany, bári saqtaýly. Jaqyn kúnderi ustalady dep úmittenemiz. Qazir Raýshan psıhologıalyq turǵyda óte aýyr jaǵdaıda. Ábden zábir kórip shoshynǵan. Tipti men qyzdyń jalǵyz ózin palatada tastap ketýge qorqyp otyrmyn. Sebebi buǵan deıin prıton ıeleri polısıadan da, aýrýhanadan da qyzdardy aqsha berip alyp ketip júrgen eken. 4 jyl boıy qyzdardy aldap ákelip, azaptap, mazaqtap, búgingideı jaǵdaıǵa jetkizgen. Raýshannyń hali keshegiden góri jaqsardy, óz-ózine endi keldi. Bazarǵa men ózim qajet zatymdy alýǵa bardym. Janymda bazardaǵy saýdagerler, basqa da bir top azamat boldy. Qylmyskerler qolyndaǵy eń baǵaly dúnıesinen aırylǵandaı qyzdy meniń qolymnan julyp áketpekshi boldy. Men olarda qarý bolǵanyna 100 paıyz kepildik beremin. Ol qyzdy nege izdeıdi? Álbette, nanynan aırylyp jatqasyn osylaı ábigerge túsedi. Bulardyń qolyndaǵy qyzdar jyldar boıy óz úılerin, baýyrlaryn kórmegen. Taıaqtyń astynda ómir súrgen. Qazir Raýshannyń qaýipsizdigine ózim jaýapty bolyp otyrmyn, — deıdi Gúlbahram Júnisova.
Onyń sózinshe, Raýshannyń ákesi Qarǵaly aýylynda bireýdiń malyn baǵady eken. Al inisinen múlde habarsyz. Barlyq týǵan-týysynan kúder úzgen. Anasy qaıtys bolǵan. Al Raýshan syndy taǵy 20 shaqty qyzdy quldyqta ustap otyrǵan apaly-sińili Venera men Aıgúl degen áıelder Jetisý aýdandyq İshki ister bóliminde qamaýda otyrǵan kórinedi.
Gúlbahram Júnisovamen sóılesken soń biz jábirlenýshiniń óz aýzynan osy qylmystyń jaı-japsaryn estıik dep Almaty oblystyq aýrýhanasyna arnaıy bas suqtyq. Raýshan bizdi samarqaý qarsy aldy. Dárigerler qoıǵan dıagnoz boıynsha qyzdyń mıy shaıqalǵan, qol-aıaǵy jaralanǵan. Shoshynyp qalǵan. Áıtse de bizdiń saýaldarymyzǵa tolyq jaýap bere aldy. 4 jylda kórmegen qorlyǵy qalmaǵan qyz o basta jeńil júriske óz erkimen túskenin moıyndady.
— Osydan tórt jyl buryn «Altyn orda» bazary mańynda bir taksıge otyrdym. Jezókshelikpen aınalysýdy maǵan sol kisi usyndy. «50-50 shartymen jumys isteısiń, jatar ornyń, isher asyń tegin, qydyratyn jerińe qydyryp, elden táýir ómir súresiń», — dedi. Men kelistim. Ol óziniń adamdaryna habarlasyp, olar meni bir saǵattyń kóleminde alyp ketti. Jarty jyldaı maǵan urmaı, soqpaı, baryn berip, jaqsy qarady. Keıinirek bir kúnde 30 myń teńge «plan» shyǵarasyń degen talap qoıa bastady. Tappasam, soqqyǵa jyǵyp, oqtaýmen uratyn. Venera men Aıgúl kúni boıy óz úıleriniń sharýalaryn jasatatyn. Sál qatelessem, aıamaı sabaıtyn. Basymnan pyshaqpen uryp qan-josa qylyp, qandy toqtata almaı ózderi de úreılengen kezder boldy. Venera meni qonaqúıge aparyp, keshki saǵat 9-dan tańǵy 6-ǵa deıin, shal demeı, mas demeı, neshe túrli erkekterge qyzmet kórsetýge májbúrleıtin. Klıentterden kómek suraǵanymdy bilip qoıǵanda ólimshi etip tepkilegen. Bir apta eshteńege jaramaı qaldym. Veneranyń ápkesi Aıgúl jany ashyp ortamyzǵa túsetin.
Raýshandy qorlaǵan Venera
Veneranyń ápkesi Aıgúl
Aramyzdaǵy bir qyzdy ózim qashyryp jiberdim. Oǵan: «meni qutqar, myna jerden alyp shyq», — degenmin. Biraq jarty jyl kúttim, qyzdan habar bolmady. Sonyń ózinde bir ret qashyp ketip, týysymnyń úıin panaladym. Venera adamdarymen kelip, «Altyn orda» bazarynda samsa jep turǵan jerimnen qolymdy qaıyryp alyp ketti. Taǵy da taıaq jedim, oqtaý synǵansha urdy, qorlyqtyń neshe túrin kórdim, — deıdi Raýshan.
Jábirlenýshi osydan 10 shaqty kún buryn qashyp shyǵypty. Amalyn taýyp ózderin qamap ustaıtyn úıdiń esigin ashyp, qylmyskerlerdiń syrtynan kilttep ketken. 10 kún boıy jertólede túnep júrgen Raýshan 5 mamyr kúni «Saıahat» jaqqa keledi. Sol jerde Veneranyń 1998 jylǵy uly kezdesip, qorqytyp-úrkitip, kólikke uryp-soǵyp otyrǵyzǵan. Baǵdarshamǵa jaqyndaǵanda Raýshan júrip bara jatqan kóliktiń esigin ashyp, sekirip túsken. Qarsy bette qatty kele jatqan kólik qyzdy qaǵyp, sol jerde esinen tanǵan. Baǵdarsham mańynan ótip bara jatqan kezdeısoq jigit Raýshandy kóterip, halyq kóp shoǵyrlanǵan orynǵa ákeledi. Olardyń artynan ile-shala Arman degen jigit «qyzdyń aǵasymyn» dep julqyp alyp ketpekshi bolady. Bazardyń ishinde aıǵaıǵa basqan qyzdy Gúlbahram Júnisova men saýdagerler qorǵap qalady.
Raýshan bul prıtonnyń ıeleri polısıa qyzmetkerlerimen aýyz jalasqanyn jasyrmady. Keıde qyzyl jaǵalylar jezókshe qyzdardy 3 saǵatqa qamap qoıady eken. 3 saǵattan keıin qujaty bar qyzdar bosap shyǵady da, qujatsyz qyzdardyń árqaısysyna prıton ıesi 30 myń teńgeden tólep, shyǵaryp alady. Keıin sol 30 myń teńgeniń esesin jumys barysynda qaıtaryp alady.
— Polısıa qyzmetkerlerine «meni jibermeı alyp qalyńdarshy» dep aıtýǵa qorqatynmyn. Sebebi olar bizdiń ıelerimizben birge jumys istedi. Maral esimdi 60 jastan asqan áıel bizge: «Jerdiń túbine tússeńder de taýyp alamyn», — deıtin. Venera men Aıgúl biz sıaqty qyzdardyń eńbegin qanap, Boraldaı jaqtaǵy Rahat aýylynan úlken úı salyp, sý jańa kólikter satyp alǵan. Munyń bári – bizdiń 4 jyl boıǵy beremiz dep ýáde etken jalaqymyzǵa jasalǵan nárse. Ol jerdegi qyzdardyń kóbi óz erkimen júrgen joq. Aldap, arbap, qorlap ustap otyr. Isaeva Mahabbat degen qyrǵyz qyzdy múgedek bolyp qalǵansha tepkiniń astyna alyp, jibere saldy. Qylmyskerler laıyqty jazasyn alsa eken, – deıdi Raýshan.
El-jurttyń jaǵasyn ustatqan jantúrshigerlik jaǵdaı eskerýsiz qalmaýy kerek. Qamshy.kz aqparat agenttigi quzyrly oryndardan tıisti sharalar qoldanýdy talap etedi.
Araıly Jaqsylyq
