Dızaıner ári sáýletshi, Qazaqstan valútasy – teńge men memlekettik rámizderdiń avtory Tımýr Súleımenov 76 jasynda qaıtys boldy. Ol 10 mamyr kúni tańerteń uzaqqa sozylǵan syrqattan kóz jumdy.

Tımýr Súleımenov 1943 jyly 14 aqpanda týǵan. Lenın atyndaǵy Qazaq polıtehnıkalyq ınstıtýtyn (qazir Qanysh Sátbaev atyndaǵy QazUTÝ) "sáýletshi" mamandyǵy boıynsha bitirgen. Sovet odaǵy jyldary jobalaý ınstıtýttarynda ("Kazgorstroıproekt", "Almaatagıprogor") sáýletshi, Almatynyń burynǵy Kalının aýdanynda (qazirgi Bostandyq aýdany) bas sáýletshi, Qazaqstan sýretshiler qorynyń bas sýretshisi bolǵan. 1987 jyly Qazaqstan dızaınerler odaǵyn quryp, sodan beri onyń prezıdenti bolǵan.

Qazaqstan táýelsizdik alǵan jyldary Tımýr Súleımenov alǵashqy teńgeniń, memlekettik rámizderdiń, Respýblıkalyq ulan áskerı formasynyń dızaınyn jasaýǵa qatysty. Keıin Almatynyń qala qurylysy keńesiniń quramynda boldy, Abaı men Dostyq dańǵyldaryn, Tóle bı kóshesin qaıta qurý jáne abattandyrý jobalaryn jasady. Qaladaǵy Jeltoqsan men Sátbaev kósheleriniń qıylysyndaǵy Almatydaǵy 1986 jylǵy jeltoqsan oqıǵasyna qatysqandarǵa arnalǵan "Bostandyq tańy" eskertkishi Tımýr Súleımenovtiń jobasy boıynsha jasalǵan.

Tımýr Súleımenovtiń týystarynyń habarlaýynsha, marqummen qoshtasy 11 mamyr kúni saǵat 10-da Almatydaǵy bilhan Qasteev atyndaǵy Óner murajaıynda ótedi.