Soltústik Qazaqstan oblysynda agroónerkásip keshenin damytý máseleleri boıynsha kezdesý barysynda Qazaqstan Respýblıkasy Premer-Mınıstriniń orynbasary – Aýyl sharýashylyǵy mınıstri Ómirzaq Shókeev agroónerkásiptik keshende memlekettik saıasatty iske asyrýdyń birqatar jańa baǵyttary men tetikterin atap ótti, dep jazady Qamshy.kz aqparat agenttigi. 
Aǵymdaǵy jyly sharýalar kóktemde tuqym sharýashylyǵynan 1 reprodýksıaly tuqymdy nemese elıtalyq tuqymdy eń tómengi norma boıynsha tegin alýdy kózdeıtin tuqym sharýashylyǵyn sýbsıdıalaýdyń jańa tetigi iske asyrylatyn bolady. Óz kezeginde, memleket tuqym óndirýshige norma boıynsha shyǵarylǵan tuqymdardyń tolyq qunyn óteıdi.
Bul rette sharýa kúzde egindi jınap bolǵannan keıin Tuqym sharýashylyǵyn damytý qoryna tuqym qunynyń 30% qaıtaratyn bolady, qor qaıtarylǵan qarajatty jınaqtaıdy jáne ony atestattalǵan tuqym óndirýshiler úshin tómengi paıyzdyq mólsherlememen (1-2%) negizgi quraldy (tehnıka men jabdyq) satyp alý men jańartýdy qarjylandyrýǵa baǵyttaıdy. Bul tetikti iske asyrý 2021 jylǵa qaraı 3 reprodýksıadan tómen emes tuqymmen 100% sebýdi qamtamasyz etýge múmkindik beredi.
Mıneraldy tyńaıtqyshtarǵa qatysty. Aǵymdaǵy jylǵy sýbsıdıany alýǵa ótinim berý jáne olarǵa tólem júrgizý elektrondy túrde júzege asyrylady, ıaǵnı sýbsıdıalaý prosesi tolyq avtomattandyrylǵan. 446 myń tonna tyńaıtqyshqa, onyń ishinde kóktemgi dala jumystary kezeńine 270 myń tonnaǵa ótinim berdi. Mamyr aıynyń ortasynda 93 myń tonna tyńaıtqysh nemese ótinim berilgen kóleminen 21% agrarıılerge jetkizildi.
Jınalys barysynda sútti mal sharýashylyǵy men shoshqa sharýashylyǵy boıynsha jańa baǵdarlamalar usynyldy.
Sútti mal sharýashylyǵyn damytý baǵdarlamasy sút ónimderin ımporttyq almastyrýǵa baǵyttalǵan. Jalpy alǵanda jyldyq mólsherlemesi 4% quraıtyn 15 jylǵa deıingi merzimge deıin qarjylandyra otyryp, sútti-taýarly jáne ónerkásiptik fermalardy qurý josparlanýda. Óndiriletin sútke taýarlyq sýbsıdıalardyń ornyna, ınvestısıalaý úshin sýbsıdıalardy jáne nesıeler men lızıń boıynsha paıyzdyq mólsherlemelerdi qoldaý sharalary qarastyrylady.
Shoshqa sharýashylyǵyn damytý baǵdarlamasynda Qytaı men Reseı Federasıasy naryǵyna et ónimderin eksporttaýdy damytýǵa erekshe kóńil bólinedi.
Ekonomıkalyq turǵydan perspektıvalyq jobalardy qoldaý jáne damytý sheńberinde etti mal sharýashylyǵy, sút óndirisi, qaıta óńdeýshi sala boıynsha zákirli kooperasıa bolatyn oblystyń birqatar iri ónerkásiptik keshenderiniń jumysymen tanysty.
Atalǵan sharalardy iske asyrý agroónerkásiptik keshendegi eńbek ónimdiligin jáne óńdelgen aýyl sharýashylyǵy ónimderin eksporttaýdy kem degende 2,5 ese arttyrýǵa múmkindik beredi.