Qazaqstan Respýblıkasynyń Reseı Federasıasyndaǵy Elshisi Imanǵalı Tasmaǵambetov VDNH-da qaıta jóndelip jatqan qazaqstandyq ǵımarat keshenine baryp kóshpeli jıyn ótkizdi.

Túrli kórmeler ortalyǵyna aınalǵan  Máskeýdegi VDNH-daǵy Qazaqstandyq ǵımarat kesheni Astananyń 20 jyldyǵyna oraı qaıtadan jaǵartylyp, sáýlet óneriniń sońǵy úlgisine saı áspettelip, sý jańa kúıinde ashylýǵa ázirlik jumystaryn júrgizýde. Qurylys jumystaryna jaýapty tulǵalarǵa  jıyn ótkizgen Qazaqstannyń elshisi Imanǵalı Tasmaǵambetov, bul eń aldymen elbasy N.Á. Nazarbaevtyń qoldaýymen jasalyp jatqan iri joba. Jýyrda bizdiń keshen osy jerdiń injý-marjanyna aınalyp, elimizdiń abyroıyn Reseı jerinde asqaqtatatynyn aıtty.

Búgingi kúni qurylys jumystarynyń qarqynyna qarap, ǵımarattyń tek ishki ǵana emes, sondaı-aq syrtqy  kelbeti aıryqsha ózgeretini baıqalyp otyr. Sebebi qaıta jańartylyp jatqan  keshenniń sulbasy adam tanymastaı ózgergen. 

"Qazaqstannyń ǵımaraty ózgelerge qaraǵanda oq boıy ozyq turýy shart. Sol sebepti qurylys júrgizip jatqan top eń aldymen sapasyna mán aýdarsa, onyń ýaqtyly bitirýin de qaperinen shyǵaryp almaýy tıis",-dep pysyqtady Imanǵalı Tasmaǵambetov.

Sonymen qatar, Elshi myrzanyń aıtýynsha, kúrdeli jóndeý jumystary barysynda ǵımarattyń kire berisi, ishki qurylymy men músinshelik kompozısıasy  erekshe sáýlet óneriniń talaptaryna saı jasalsa, baspaldaǵy men tereze áınekpen kómkerilgen kúmbez tárizdi shańyraǵy jańadan salynady. 

Eskere ketý kerek, federaldyq maǵynada mádenı mura retinde tanylǵan №11 "Metalýrgıa" kesheni 1964 jyly Qazaq KSR-nyń halyq sharýashylyq jetistikterin kórsetetin, keıinnen respýblıkamyzdyń túrli-tústi metalýrgıa, munaıgaz jáne kómir óndirý ónerkásibin pash etetin jerine aınaldy. Al  2011 jyly Reseı Federasıasy Úkimetiniń jarlyǵyna sáıkes Qazaqstanǵa 50 jylǵa jalǵa berildi.