Boxrec aqparaty boıynsha otandasymyz 6 maýsym kúni vengr boksshysy Gabor Gorbıchpen judyryqtasady, dep habarlaıdy vesti.kz.

Jekpe-jek Londondaǵy "York Hall" arenasynda ótedi. Astana ýaqytymen túngi (6-nan 7 maýsymǵa qaraǵan túni) 01:55-te bastalatyn kezdesýdi "Habar" arnasy tikeleı efırde kórsetetin bolady. Jartylaı orta salmaqta ótetin kezdesý 6 raýndqa josparlanǵan.

Gabor Gorbıch kásipqoı bokstaǵy mansabyn 2012 jyly bastaǵan. Osyǵan deıin 35 jekpe-jek ótkizgen. 24 kezdesýinde jeńiske jetip, 11 ret utylǵan. 8 birdeı elde sharshy alańǵa shyqqan. Sońǵy ret 21 sáýir kúni ózbek boksshysy Shahram Gıasovpen qolǵap túıistirip, tóreshiler sheshimimen ese jibergen. Al Shahram bolsa Rıodaǵy Olımpıada oıyndarynyń fınalynda Danıardan jeńilgen bolatyn.

"York Hall" ortalyǵynda ótetin boks keshiniń basty jekpe-jeginde chempıondyq ataq úshin Loýrens Okolı (8-0, 6 KO) men Lúk Ýotkıns (13-0, 9 KO) judyryqtasady.

27 jastaǵy otandasymyz kásipqoı bokstaǵy birinshi kezdesýin 28 sáýir kúni ótkizdi. Nú-Iorkte ótken boks keshinde amerıkalyq boksshy Noa Kıdti 3 raýndta tehnıkalyq nokaýtpen utty.

Danıar Eleýsinov kásipqoı boksqa túbegeıli naýryz aıynyń basynda aýysty. Oǵan deıin bir ret barýǵa bel býǵanmen, reti kelmegen edi. Ulybrıtanıalyq promoýter Eddı Hırnmen úshjyldyq kelisimshartqa qol qoıyp, kásipqoı bokstaǵy mansabyna jol ashyldy. Qazirgi tańda Eddı Hırn basqaratyn kompanıa quramynda asa aýyr salmaqta WBA Super, IBF jáne IBO chempıondyq ataqtaryna ıe Entonı Djoshýa bar. Sondaı-aq brıtandyq promoýter Raıan Barnett (18-0, 9 KO) (WBA Super jáne IBF), Djeımı Makdonnell (29-2-1, 13 KO) (WBA), Halıd Iafaı (23-0, 14 KO) (WBA Super), Kell Brýk (37-2, 26 KO), Denıel Djeıkobs (33-2, 29 KO) syndy boksshylarmen jumys jasaıdy.