Ózbekstan prezıdenti eldegi ımport máselesine qatysty eskertýler aıtyp, kedenshilerdi synaǵan. Shavkat Mırzıaevtiń aıtýynsha, kedenshiler bir-birin kez kelgen jaǵdaıda satyp ketýege daıyn turady. 

«Men onsyz da kedenshilerdiń jartysyn túrmege otyrǵyzdym. Tergeý barysynda báriń bir-birińe qarsy shyǵasyńdar, kimniń qansha para alǵanyn táptishtep aıtyp beresińder. Sender bir uıymnyń ókili emessińder me? Ózderiń sútten aq, sýdan taza adamdaı, óz uıymyńnyń ókilin kórge súıreýge daıynsyńdar. Eń úlken paraqor – sendersińder», - dep keltirdi ózbek basylymdary Mırzıaevtiń sózin.

Budan buryn ózbek basshysy paramen ustalǵan qarjygerlerdi «kórtyshqanǵa», prokýratýra qyzmetkerlerin «urylar men qoqysqa», «tákappar ıtke», «otan satqyndaryna» deıin teńegen eken.