İshki ister mınıstri Qalmuhanbet Qasymov elimizdegi eń ishkish oblystardy, anyǵy ishimdiktiń kesirinen jıi qylmys jasalatyn óńirlerdi atady.

Mınıstrdiń deregine súıensek, eń joǵary deńgeı Aqtóbe oblysynda baıqalǵan. Mas kúıinde jasalǵan qylmys deńgeıi oblysta 28 paıyzdy kórsetti. Qostanaı oblysynda 25,5 paıyz, Pavlodar oblysynda 22 paıyz, Mańǵystaý oblysynda – 20 paıyz jáne Aqmola oblysynda 19,5 paıyzdy kórsetti.

«Elimizde ishimdikke salyný, otbasylyq-turmystyq salada qylmys jasaý azaımaı tur», - deıdi Qasymov.

Búginde ýchaskelik polısıa ınspektorlarynyń profılaktıkalyq baqylaýynda ishimdikke salynǵan 67 myń azamat bar eken. İshimdiktiń kesirinen kúnine 2-3 qylmys tirkeledi. Osy máseleni sheshý úshin mınıstrlik tıisti sharalardy qoldanýǵa ýáde berdi.

QR premer mınıstri Baqytjan Saǵyntaevtyń birneshe aı burynǵy qaýlysyna sáıkes, spırtti ishimdikterdiń baǵasy qymbattaýy tıis edi.  Araq jáne ótkir lıker-araq ónimderiniń bir lıtriniń bólshek saýdadaǵy eń tómengi baǵasy 2018 jyly 1900 teńge etip bekitilgen.