Almatydaǵy «Boraldaı saq qorǵandary» arheologıalyq parkinde «Uly dala – kóshpendiler álemi» halyqaralyq etno-mádenı festıvali ótip jatyr, dep jazady qamshy.kz tilshisi. Kóshpendiler órkenıetin pash etetin bıylǵy shara Astananyń 20 jyldyǵyna arnalyp, «Rýhanı jańǵyrý» baǵdarlamasymen ótip jatyr.

Festıvál aıasynda alqa-qotan aq úıler tigilgen. Almaty qalasynyń ákimi Baýyrjan Baıbek, orynbasar ákim Arman Qyryqbaev pen birqatar depýtattar festıváldiń ashylýyna qatysty.  Ashylýda eń aldymen kósh sherinde Majarstan, Mońǵolıa, Ýkraına, Ózbekstan, Bashqurtstan, Tyva, Daǵystan, Saha, Altaı Respýblıkasy, Qalmyq, Býrátıa elderinen kelgen áskerı óner men ulttyq dástúrin jetik biletin ónerpazdar júrip ótti. Atalǵan elderden 100-ge tarta ókil kelgen. Al festıváldi kórýge kelgen qonaqtar sany 7 myńnan asady. Qonaqtarǵa «Sazgen sazy» etno- fólklorlyq ansambli ,«Ulytaý», «Alashuly», «Samrad» toptary ulttyq mýzykadan kúmbirlegen kúı shashý shashyp, ánge bóledi.

Qazaq eli ókilderi kósh sherýde aldymen «Altyn adam» beınesindegi jaýynger bastaǵan atty jasaqpen bastap,  jaıaý jasaq, sadaqshylar qosyny, túıeli kósh,  at qulaǵynda oınaıtyn shabandozdar, bıshiler qamtylǵan saltanatty júris jasady. Kókpar, aýdaryspaq, qyz qýý dástúrleri kórsetildi. Qonaqtar búrkit ustap, taz ertken saıasatshylarǵa, qazaqtyń iri deneli, batyr tulǵaly jigitterine tańǵalyp sýretke túsip jatty. Ulttyq qolónerdiń kórmesi qonaqtardy kózaıym etse, dámi til úıretin ulttyq taǵamdarǵa tańdaı qaqtyrdy.

Festıvál aıasynda akrobatıkalyq kórinister, sadaq atý, báıge, balýan kúres, tipti asaý úıretý dástúrleri kórsetildi. Etno shara erteń de jalǵasyn tabady. Kórermender arasynda «Eń ádemi ulttyq kıim» baıqaýy uıymdastyrylyp, jeńimpazdarǵa baǵaly syılyqtar tabystalatynyn umytpańyz.

Eske salsaq, ótken jylǵy 24-25 maýsymda da Almatyda etnofestıval «Uly dala rýhy» degen atpen ótken edi. Onda 10 memleketten ónerpazdar qatysqan bolatyn.