Kesheli beri Qytaıdan qashyp, shekarany zańsyz kesip ótken Saıragúl Saýytbaıdyń densaýlyǵyna qatysty aqparat taraldy.

WhatsApp jelisi arqyly taralǵan aqparatqa sáıkes, Taldyqorǵan qalasyndaǵy ýaqytsha tergeý ızolátorynda qamaýda otyrǵan Saıragúl Saýytbaı Almaty oblystyq aýrýhanasynyń neırohırýrgıa bólimine jetkizilgen. Sáýle Ábedınova bastaǵan bir top jýrnalıs muny anyqtaý úshin tikeleı aýrýhanaǵa bardy. Aýrýhana qyzmetkerleri áıeldiń mıy shaıqalǵanyn, esinen tanyp qulaǵanyn jetkizdi. Alaıda qazir jaǵdaıy qalaı ekenin ári operasıanyń jasalǵan-jasalmaǵanyn ashyp aıtpady.

Advokaty Abzal Quspan da aqparatty rastaǵanymen, «tergeý barysynda Saıragúldiń jaǵdaıy qalypty bolǵan, densaýlyǵyna shaǵym túsirmegen» deıdi. Kúıeýi de jarynyń deni saý bolǵanyn aıtady.

Jýrnalıser men belsendiler qazirgi ýaqytta Almaty oblystyq aýrýhanada Saıragúl Saýytbaıdyń densaýlyǵyna qatysty qandaı da bir málimet anyqtaýǵa tyrysyp júr. Birneshe ýaqyt buryn dárigeri Qaırat Saǵyndyqulymen de tildesti. Alaıda aýrýhana qyzmetkeri áıeldiń densaýlyǵyna qatysty jarytyp eshteńe aıta qoımady. Tek esinen tanyp qulaǵanyn jetkizdi. Al sebebi aıtylmady. Áıeldiń jaǵdaıy jaıly maǵlumatty naqty bilý úshin belsendiler aýrýhana basshylyǵynyń ruqsatyn kútip otyr. 

Aıta keteıik, bıyl sáýirdiń ortasynda Qazaqstanǵa ótken Saıragúldi mamyrdyń 22-si keshke 21.00-21.30-dar shamasynda shekara qyzmetkerleri, úıinde otyrǵan jerinen ustap áketken. Sebebi jary men eki balasyna asyqqan áıel Qazaqstan shekarasynan qujatsyz ótken. Al áıeliniń qujatsyz qalaı ótkeninen joldasy Ýálı Silám habarsyz edi. Alǵashynda Jarkenttiń ýaqytsha tergeý ızolátorynda otyrdy. Bir-eki apta buryn Taldyqorǵan ýaqytsha tergeý ızolátoryna aýystyrdy.