Dárigerler balalar ústine janarmaı quıyp, órtep jibergen Maksım Legostaevtyń jaǵdaıy týraly aıtyp berdi.

«Alty jasar pasıent 17 maýsymnan beri №2 aýrýhanada turaqty em qabyldap jatyr. Balanyń basy, moıny, arqasy men ıyqtaryn kúıik shalǵan», - dedi Jambyl oblystyń densaýlyq saqtaý basqarmasy.

Qazirgi ýaqytta balanyń jaǵdaıy jaqsy. Em qabyldaý barysynda kúıik 18 paıyzdan 12 paıyzǵa deıin qaıtqan. Ári em qabyldaý prosesi tegin júrip jatyr.

Buǵan deıin Maksımge eki márte operasıa jasaldy, kúıgen terisiniń ornyna basqa teri ornalastyryldy. Áli qoldary men arqasyna birneshe operasıa jasalmaq.

Aıta keteıik, 17 maýsymda Maksım №2 aýrýhananyń reanımasıa bólimine túsken. Balalar ony ń ústine janarmaı tógip, keıin órtep jibergen. Oqıǵa oıyn ústinde boldy. Atalmysh iske qatysty sotqa deıingi tergeý jumystary júrgizilip jatyr.