2018 jyldyń 9 shildesinen bastap 31 arnadaǵy «Informbúro» jańalyqtar baǵdarlamasy jańa stýdıadan habar tarata bastaıdy. Sándi dekorasıa, joǵary tehnologıalyq jaryq beretin qurylǵylar, zamanaýı apparatty-stýdıalyq keshen – osynyń bári aqparattyq habar taratý deńgeıin kóterýdiń mańyzdy kezeńderiniń biri.
«Informbúro» – táýelsiz Qazaqstannyń eń tabysty baǵdarlamalarynyń biri. Onyń alǵashqy shyǵarylymy 1996 jyly efırge shyqqan. Búgingi tańda «Informbúro» Qazaqstandaǵy aqparat taratýshy baǵdarlamalardyń kóshin bastap júrgen jobalardyń biri. Birneshe jyl qatarynan «Úzdik aqparattyq baǵdarlama» nomınasıasy boıynsha «Tumar» televızıalyq syılyǵyn ıelendi.
«Informbúro» baǵdarlamasy kórermenderiniń qalaýyn qanaǵattandyrý maqsatynda birneshe márte ımıjdik ógeriske túsip, árdaıym jetilip otyrdy. Bul dástúr búginde saqtalǵan, onyń ústine zamannyń talaby basqa, - deıdi 31 arnanyń Bas dırektory Baǵdat Qojahmetov. – Sol sebepti biz de zaman aǵymyna ilesip, burynǵydan da áserli, este qalalarlyq jańalyqtar baǵdarlamasy ataný úshin jańa stýdıa jasaý týraly sheshim qabyldadyq. Jańa stýdıa nemistiń ARRI kompanıasynyń ınovasıalyq jaryqtarymen jáne úzdik halyqaralyq dızaınerlerdiń zamanaýı dekorasıalarymen bezendirilgen».
Kadrdyń múltiksizdigine qol jetkizý úshin stýdıa jumystaryna belgili qoıýshy operator Pavel Bykovchenkony shaqyrdyq (2014 jyly Sochıde ótken Olımpıada men Paralımpıadanyń ashylý jáne jabylý saltanatynda jumys istegen). Ol bizge jańa engizilimniń erekshelikteri týraly baıandap berdi. «Stýdıaǵa bir ýaqytta birneshe adamdy otyrǵyzyp, jaryq pen arttaǵy kórinisti ózgertý arqyly múlde jańa kartına qurap shyǵarýǵa bolatyn birneshe túsirilim núktesi bar, - deıdi Pavel. – Jańa stýdıanyń múmkindigi jańalyqtar baǵdarlamasynyń talaptarynan áldeqaıda joǵary. Onyń kólemi eski stýdıadan aıtarlyqtaı úlken. Televızıanyń qudireti sol, keıde stýdıadaǵy 2-3 metr artyq keńistiktiń ózin bezendirip, jańa ıntererdiń kómegimen ózgertse, kadrda múlde basqa kórinis shyǵa keledi. Kıno týraly aıtylǵan «tańǵajaıyp ıllúzıa» degen klasıkalyq teńeý osy televızıa salasyna berilgen dál anyqtama. Sol aıtpaqshy, jańa stýdıaǵa bir ýaqytta birneshe adam sıady. Bir júrgizýshi otyryp júrgizse, endi biri ornynan turyp baǵdarlama júrgize alady. Taǵy bir qyzyqty jaıt, jaryqdıotty ekran bir núkteden ekinshi núktege ońaı aýysyp, túsirilimniń rakýrsyn ózgertip otyra alady».
Stýdıadaǵy jaryq júıesin jasaqtaýǵa nemistiń ARRI Lighting kompanıasynyń jańa zamanǵy jaryqdıotty jaryq berý qurylǵylary qoldanylǵan. ARRI kompanıasy óziniń júz jylǵa jýyq tarıhynda kásibı maqsattaǵy jaryq qurylǵylaryn jasaý salasyndaǵy eń myqty álemdik sarapshylardyń biri degen atqa ıe.
Endi osy tehnıkalyq jańartýlardyń arqasynda «Informbúro» júrgizýshileri kontenttiń sapasyn odan ári arttyryp, telekópirler uıymdastyryp, dúnıejúzindegi tilshilermen tikeleı baılanysqa shyǵyp, «jandy reportajdar» júrgizip, kórermenge qyzyqty degen qonaqtardy kóptep shaqyrady degen úmittemiz.
