Otandasymyz Astanada ótken boks keshinde túrik boksshysy Hıznı Altýnkaıany jeńdi, dep habarlaıdy vesti.kz.

Kásipqoı boksqa oralǵan Beıbit Shúmenov birinshi aýyr salmaqta WBA chempıondyq belbeýin jeńip aldy. Otandasymyz Astanada ótken boks keshinde túrik boksshysy Hıznı Altýnkaıany utty.

Qazaqstandyq boksshy qarsylasyn birinshi raýndta bir ret nokdaýnǵa túsirdi. Búıirden tıgen soqqydan keıin túrik boksshysy bir tizerlep aldy. Keıingi eki raýndta boksshylar bir-biriniń osal tusyn ańdyp, jekpe-jekti jalǵastyrdy. Beıbit ár sát saıyn shabýyldap, qarsylasyn buryshtan-buryshqa tyqsyrýmen boldy.

Sharshy alańdaǵy Beıbittiń basymdyǵy tórtinshi raýndta da baıqaldy.  Qasha júrip judyryqtasqan Hıznı de qalysyp qalmady. Reti kelgende soqqy jasap qalýǵa umtyldy. Biraq túrik boksshysy tózimdilik tanytyp, soqqylardan sytylyp shyǵýmen boldy. Toǵyzynshy raýndta Beıbittiń dóp tıgen taǵy bir soqqysynan keıin Hıznı Altýnkaıa ekinshi ret nokdaýn aldy.

Toǵyzynshy raýndtan keıin túrik boksshysynyń jattyqtyrýshylary jekpe-jekti toqtatý týraly sheshim qabyldady. Nátıjesinde Beıbit Shúmenov tehnıkalyq nokaýtpen jeńiske jetti. Birinshi aýyr salmaqta WBA chempıondyq ataǵyn ıelendi.

- Elordanyń 20 jyldyǵy qutty bolsyn! Elbasymyz aman bolsyn! Jigitterdiń jeńisi qutty bolsyn! 2-3 jyldyń ishinde Qazaqstannan kóp chempıondar shyǵatynyna kúmánim joq, - dedi boksshy.

Beıbit Shúmenov sońǵy jekpe-jegin 2016 jyldyń mamyrynda ótkizgen edi. Odan keıin kásipqoı bokstaǵy mansaby aıaqtalǵanyn habarlaǵan-dy. Bıyl sharshy alańǵa qaıta oraldy.