Aral muńy barsha qazaqtyń muńy dep bilemiz. Vıdeo-poezıany kótere otyryp Jer ananyń meıirimdiligine tań qalasyń. Sebebi tabıǵatty aıalap, ekologıa úshin jappaı kúresý áli de kesh emes.
Jasyndaı jyrlarymen jarq etip, 70-jyldardyń ortasynda ádebıet álemine iz salǵan Aıtýar Sabyrovtyń "Ekologıalyq jyr" atty óleńine Masaget saıtynyń túsirgen vıdeosyn usynbaqshymyz. Týyndy Masaget tilshileri men "QazaqGeography" uıymynyń Aral teńizine jasaǵan 20 kúndik ekspedısıasy aıasynda daıyndalypty. "Ekologıalyq jyr" oqyrman men kórermenge kóp oı salary anyq.
Asaý tolqyn aıaǵyn qumǵa malyp,
Arnasyna qaıǵy men muń qamalyp.
Qaırańdaǵy shabaqtaı Aral búgin,
Aýnaqshıdy baýyryn kúnge qaryp.
Ný qamys joq – qýrady,
Seldiredi.
Jaǵada tek qum kóship, jel júredi.
Demi qysqan aýrýdaı álsin-álsin
Qar shyńdarǵa qaraıdy, telmiredi.
Telmiredi –
Uzaq kún kóz almaıdy,
Al jaǵada alapat tozań-qaıǵy,
Ala quıyn ishinen anda-sanda,
Jetim keme jelkeni bozańdaıdy.
Bozańdaıdy – tek qana kóz aldaıdy,
Shybyn janym shyrqyrap tóze almaıdy...
Qulandar joq jaǵada óre shapqan,
Balyq ısi shyqpaıdy jer oshaqtan.
Úmit kútip búginnen, bolashaqtan,
Aral jatyr kózinen sorasy aqqan!
Baıǵusym-aı kórdiń be nala jurttan,
Qalaı basam kóńildi alaburtqan?!
Qart Pamır de tur, áne, muńǵa oranyp,
Qara oramal jamylyp qara bulttan.
Adam boldy-aý túbinde qurtar qaıǵyń,
Ashýlanyp nesine burtańdaımyn.
Janaryma ırilgen qos tamshyny,
Sábıime kórsetpeı syrt aınaldym...
Avtory: Aıtýar Sabyrov
