Mynaý seniń taýlaryń, ózenderiń,
Al sen bolsań álemdi kezem dediń.
«Jalaqysy jetpeıdi» dep jylama,
Óz úıińe baratyn óz eńbegiń!

«Shetel» dediń, baratyn endi meken,
Sol sheteliń bizderdi kórdi me eken?
Seniń ániń árdaıym shyrqalsyn dep,
Babań úni ishinde óldim, kókem!

«Ketem» dediń, ketersiń ketkendermen,
Sen úshin dep ata-anań tókken termen.
Sen ketkende artyńda jurtyń qalar,
Uly toı dep barlyǵyn kóppen kórgen.

«Ómir súrý qıyn» dep syn aıtasyń,
Ana jaqta sen kimge syr aıtasyń?
Seniń anaý úıińniń ákeń keshe,
Saldy emes pe súıretip bir aı tasyn...

Seniń ákeń shydaǵan otbasym dep,
Áıel-balam jat jerde jatpasyn dep.
Týǵan jerge týyńdy tigip berse,
Nege burdyń jat jerge at basyn kep?

Bilim izdep kelem de marqaıamyz,
Sen týraly aıtamyz jarty aı ańyz.
Bálkim seniń arqańda shalqaıamyz,
Shetelsiz-aq shirenip qartaıamyz!

«Ketem!» deme, «Kelem!» de ilim alyp,
Biz bilmegen bilimdi bilip alyp.
Ketkenderge kórsetshi kók týyńdy,
Qoldarynan solardyń julyp alyp.

Sen ketpeseń, olar da ketem demes,
Qarashy áne, kún saıyn eki elde eges.
Jaqsy ómirdi jasaýyń baýyrym-aý,
Judyryqta jumylǵan, shetelde emes!

Bir qazaqtyń balasy elim dese,
Emirener jylaǵan eliń keshe.
Myń qazaqtyń taǵdyry qolynda tur,
Bir qazaqtyń balasy erinbese!