«Men ómirdi súıemin. Ómir – Alla Taǵalanyń bergen eń keremet syıy. Ony baǵalaý kerek, tek alǵa júrýge talpyný kerek», - deıdi qaterli isikke shaldyqqan Aınur Súleımenova.
Al siz úshin ómir degen ne? Ómirge qanshalyqty qushtarsyz? Keı sátterde bárinen túńilip, qolyńyzdy bir siltep, álemnen baz keship ketýdi ańsaısyz, solaı ma? Denińiz saý, baýyryńyz bútin bola tura ómirden jalyǵasyz. Aıtýǵa turmaıtyn qıyndyqqa shydaı almaı, ólip ketýge deıin barasyz. Alaıda bul oılaryńyzdyń bárin 360 gradýsqa buryp, sizdi ómirge talpyndyratyn, onyń shyn mánisinde ǵajap ekenin sezdiretin jandar bar. Tek sizden aıyrmashylyǵy, olardyń basyna túsken qıyndyq áldeqaıda aýyr. Búgingi keıipkerimiz Aınur osydan jarty jyl buryn óziniń qaterli isikke shaldyqqanyn biledi. Dárigerlerdiń qateliginen jas kelinshek isigin asqyndyryp aldy, derttiń eń aýyr sanatyna shaldyqqan. «Úmit úzildi-aý» dep oılady týystary, «emdeı almaımyz» dedi mamandar. Biraq... biraq... «Berilme, birge jeńemiz» dedi kúıeýi, «Anashym, sen janymyzǵa oralasyń» dedi balalary, «Men ómir súremin» dedi Aınur.
«Dıagnozdy durys qoımaǵan»
Densaýlyǵym syr berse, birden aýrýhanaǵa qaralatyn adammyn. Osydan jarty jyl buryn da solaı istedim. Byltyr kúzde keýde tusym aýyryp júrdi. Dárigerlerge júgindim, tekserildim. Olar maǵan «fıbrozdy-kıstozdy sút beziniń aýrýy» degen dıagnoz qoıdy. Qarashadan aqpan aıyna deıin atalǵan dıagnoz boıynsha emdelip júrdim. Alaıda jaǵdaıym kún sanap nasharlaı berdi. Tipti óz betimshe júrip-turýdan qaldym. Tehnologıa damyǵan zaman ǵoı, ınternettiń de kómegine júgindim. Meniń jaǵdaıymda ne isteýge bolady, bárin oqydym. Bıopsıa alý kerek eken. Odan da óttim, keýdemniń aınalasyna túrli jaralar shyǵyp, irińdeý bastady. Dárigerler irińdi soryp almaq bolyp, sút bezin tesken sátten bastap, jaǵdaıym kúrdelene tústi. Terim de ábden zaqymdanǵan.
Birde uıqymnan tursam, kókiregimniń bir jerge qaraı qısaıyp qalǵanyn baıqadym. Internetten munyń da sebebin bilýge tyrystym. Onkologıanyń alǵashqy belgisi eken. Kúıeýim ekeýmiz meni emdep júrgen dárigerlerden kúdiktene bastadyq. Bilikti maman izdeý úshin Qazaqstandy araladyq.
«Mendegi isik asqynǵan»
Túbinde Almatyda Murat Isauly degen dárigerge jolyǵyp, ol kisi maǵan taǵy da bıopsıa alýym kerek ekenin eskertti. Aqyly túrde bıopsıaǵa tapsyryp, 10 kúnnen keıin úshinshi dárejeli sút bezi qaterli isigine shaldyqqanymdy bildim. Ári mendegi isik asqynǵan eken. Dárigerler ota jasaýǵa ruqsat bermedi. İsik qanǵa túsip ketedi eken. Ondaı jaǵdaıda barlyq aǵzam zaqymdanady. Tek hımıoterapıadan óttim. Alaıda belgilengen segiz hımıoterapıanyń beseýin ǵana óttim. Qalǵanyna shamam jetpegendikten, úzýge týra keldi. Júregime aqaý tústi, aǵzalarym aýyra bastady.
Sáýirde Koreıadan mamandar kelip, maǵan úmit syılap ketti. İsikti alyp tastaıtyndaryn, elde ondaı medısına damyǵanyn aıtyp qýantty. Al Qazaqstanda dárigerler «qaterli isikti alyp tastaǵannyń ózinde ornyna jabatyn teri joq, teri buzylǵan» dep ota jasaýdan at tondaryn ala qashatyn.
Sóıtip júrip kóligimizdi, keı dúnıelerimizdi satyp qarajat jınadyq. Ózimiz turǵyzǵan úıimizdi satylymǵa qoıdyq. Ramazan aıynda qarajat jınaýda qol ushyn sozǵandardyń qatary kóp boldy. Qazaqstandy aralap júrip, bir dárigerdi taýyp aldym. Ol da dertimniń asqynǵanyn aıtty, úmit syılap, ýáde bergisi kelmedi. Alaıda qolynan kelgenin aıanbaıtynyn da jasyrmady. 10 shildede maǵan alǵashqy operasıa jasaldy. Seısenbi kúni. Ázirge áseri, nátıjesi belgisiz. 10 kúnnen keıin bárin anyqtaıtyn bolamyz. Tek dárigerim esimin jasyryn ustaýdy ótindi. Al maǵan bir jaǵdaı bolyp qalsa, dárigerge kiná artpaıtynymyzdy aıttyq. Sebebi mendegi derttiń aýyrtpalyǵyn menen artyq eshkim bilmeıdi.
Endi medısınalyq ońaltý prosesine barmaqshymyn. Qarajatymyz jetpese de, kúıeýimniń qoldaýymen ómirdiń bul baspaldaǵynan da ótemiz.
Balalarynyń kóńiline qaıaý túsirmes úshin jasandy shashpen júredi
«Jubaıym – qamqorshym, balalarym – qoldaýshym»
Ómir súrgim keledi. Talpynamyn. Tyrysamyn myqty bolýǵa, ata-anama, balalaryma qınalyp júrgenimdi kórsetpeýge, janymnyń qajyǵanyn bildirmeýge.
Kúıeýim ekeýmiz 5-synyptan beri birge oqımyz. Bir partada otyryp, qol ustasyp mektepti bitirdik. Shańyraq kóterip, balaly-shaǵaly boldyq. Ómirde tek baqyt qana bolady eken-aý dep júrgende, Alla Taǵala basymyzǵa osyndaı bir aýyr synaq berip qoıdy. Ómirdiń aǵymen qosa, qarasyn da qabyldaýdy úıretti. Osy sátterde jarym, shańyraǵymyzdyń otaǵasy árdaıym meniń janymda boldy. Men qınalǵanda, myqty bolýyma sol jan septigin tıgizdi. «Bárin birge jeńemiz, dertińnen qulan taza aıyǵasyń, áli talaı baqytty kúnderdi bastan ótkeremiz, tek sen berilme» degen sózderi maǵan qanat bitirdi. Qalaısha jeńile salamyn?!
Jary Dastanmen
Qazir aýrýhanada jatyrmyn. Kishi qyzym Aısha kúnde tańerteń habarlasyp «Anashym, qaıyrly tań!» dep aıtady. Alladan meniń tezirek saýyǵyp ketýimdi tileıdi, duǵa etedi. Balalarym da qınalyp júrgenderin maǵan kórsetpeýge tyrysady, meniń myqty bolýyma olar da septesip júr. Olardyń osyndaı aqyldy, sanaly bolyp ósip kele jatqandaryna shúkir deımin. Olar meni kútip júr. Qalaısha jeńile salamyn?!
Aınurdyń balalary: Danıel 13-te, Imanáli 6-da, Aısha 4-te
Týystarym, tanystarym mendegi derttiń úshinshi dárejeli ekenin bilgen soń jandary ashyǵan túr kórsetip, menen bas tartady. Sol sátte-aq óldige sanaıdy. Al men saýyǵatynyma, otbasyma oralatynyma senemin. Qalaısha jeńile salamyn?!
Meniń tileýimdi tilep otyrǵan ata-anam bar. Ákem úsh qyzyn qanattyǵa qaqtyrmaı, tumsyqtyǵa shoqtyrmaı, boıymyzǵa naǵyz qazaq qyzyna tán qasıetterdi darytyp ósirdi. Olardyń kóńilderine qalaısha qaıaý túsirmekpin?! Kerisinshe, bizge, maǵan artqan úmitterin aqtap, qýantyp júrýden asqan qandaı baqyt bar? Aıtyńyzshy, qalaısha jeńile salamyn?!
«Ómirge ǵashyq bolyńyz»
Basyna qıyndyq túsken jandarǵa aıtar keńesim: ómir qamshynyń sabyndaı qysqa. Baǵalaı bilý kerek. Eshkimniń basyna aqsha bult, tabanynyń astyna túbit tósep qoımaıdy. Álsizdik tanytpańyz. Álem ádemi. Adamnyn jan dúnıesi, oıy barlyq dáriden myqty.
Aspanǵa bir kóz salyńyzshy... Qandaı tamasha! Keýdeńizdi demge toltyryp, Jaratqanǵa shúkirshilik etińiz! Ómir degen keremettiń árbir sátinen rýhanı azyq alyńyz! Siz myqtysyz!
Qarańyzshy, derti asqynyp, ál-dármeni taýsylsa da, Aınurdyń rýhy kúnnen-kúnge kúsheıip keledi. Ómirge degen qushtarlyq onyń úmitine úmit syılap, myqty bolýyna septigin tıgizdi. Tipti ony «naýqas» deýge de aýzyń barmaıdy eken, joq Aınur naýqas emes, ol – men biletin eń jigerli ana, eń batyl arý. Muny óziniń Instagram paraqshasyndaǵy ár jazbasy dáleldeı túsedi. Oqyńyz, úlgi alyńyz, siz de duǵada bolyńyz. Ómirdi súıetin janǵa ómir syılaýǵa atsalysyńyz.
Qarjylaı kómek úshin:
KASPI GOLD kartasy: 5169 4931 0085 6007
Súleımenova Aınur Qabylqaqyzy JSHS: 820701401432
SBERBANK kartasy: 4424 7710 1226 4095
Jary Myrzahmetov Dastan JSHS: 820721300992
SENTR KREDIT kartasy 4667209620942154
HALYQ BANK kartasy: 4402573556822098
