Eń sońǵy ret memlekettik emhanaǵa qashan qaralǵanym este joq. Áskerden keıin (1987-88 jj.) stýdenttik emhanada komısıadan ótkenim bar edi. Sol sońǵysy ǵoı deımin. Keıin aıynda-jylynda "Suńqarǵa" bas suǵatynmyn. Ol kezde qyzmet aqysy lıberaldy edi. Qazir aspandap ketipti. Endi kópten oıda júrgen densaýlyǵymdaǵy bir máseleni sheshpek bolǵam. Ol úshin eki ret pyshaqqa túsýim kerek. Ótken aptada memlekettik emhanaǵa tirkelip, dárigerlerdiń qaraýyna jazylǵam. Qudaı saqtasyn! Birinshi qabyldaǵan dáriger ÝZI-ge, onkologıalyq ortalyqqa bıopsıa alýǵa jáne tomografıaǵa jiberdi.

Sonymen qosa, Almaty qalalyq №20 aýrýhanadaǵy hırýrgten de keńes alýym kerek eken. ÝZI №20 emhanada bar. Biraq mamany joq kórinedi. Sondyqtan jekemenshik emhananyń ÝZI-inen ótýge usynys jasady. Dál sol sıaqty emhanada tomografıa apparaty da bar. Biraq sebebin bilmeımin, ol da jumys istemeıdi. Qalalyq dıagnostıkalyq ortalyqta tomografıanyń kezegine bir aı buryn jazylady ekensiń. Sondyqtan tomografıany da jekemenshik klınıkadan ótýge usynys jasady. Eń qyzyǵy - jekemenshik klınıkany tańdaı almaısyń. Dárigerdiń bergen vızıtkasy boıynsha barasyń. Tipti, bir jekemenshik klınıkaǵa 20 myń teńge tóleseń, úıden máshınemen áketip, ÝZI-ge ózderi túsirip beredi eken. 

Keshe bir kúnim tutastaı №4 aýrýhana men №20 emhana arasynda ótti. Bitirgen túgim joq. Biraq ózimshe mynandaı jańalyq ashtym: №4 aýrýhana ishinde Dıagnostıkalyq ortalyq bar eken. Túgeldeı aqyly qyzmet kórsetedi. Dálizge kirgennen kilem tóselgen, preıskýrantyna kózim túsip edi, teris aınaldym. Baǵa degen boı bermeı ketken. Al tegin medısınalyq qyzmet kórsetetin bólimde shuǵyl jaǵdaımen túsken adamda esep joq. Dárigerlerdiń olarǵa qaraýǵa saǵattap ýaqyty jetpeı jatyr nemese qasaqana qaramaıdy. Saýsaǵy julynyp ketken bala eki saǵattan astam kómek ala almaı yńyrsyp otyrǵanyn kózben kórdim.

Osynda jarıaladym. Sonda, bizdiń "Salamatty Qazaqstan" baǵdarlamasy boıynsha bólip jatqan mıllıardtar qaıda ketip jatyr? "Mindetti medısınalyq saqtandyrý" boıynsha jınalǵan pálenbaı trıllıon teńge qaıda? Búgin taǵy da osy sqema boıynsha júgirip júrmin. "Operasıa jasatyp, emdelip bolǵanymsha, medısına salasyndaǵy birshama bylyqtarmen arpalysatyn boldym-aý" dep jynym kelip otyr! Endi maǵan jetpegeni osy edi!

Toqtar Jaqash-tyń Facebook-tegi paraqshasynan alyndy