Reseıge bet alǵan avtobýs kenetten órt qushaǵyna oranǵan kezde jedel qımyldap, qaısarlyq tanytqan qazaq jigiti búgingi tańda qujatsyz, bir tıyn aqshasyz kórshi eldiń kóshelerin kezip júr eken degen aqparatty kózimiz shaldy. Reseılik saıttarǵa kirip qarasaq, Qazaqstannan Novosibirge jolǵa shyqqan avtobýs shynymen de tańǵy tórt shamasynda órtenip ketipti. Qalyń uıqyda jatqan 48 adamdy oıatyp, olardy qutqarǵan qazaq jigiti bolyp shyqty. «Otandasymyz qaıda? Onyń mundaı kúı keshýine ne sebep boldy?» degen bizdiń suraqqa «Komsomol shyndyǵyn» jazatyn jýrnalıser jaýap taba bildi. Máseleniń egjeı-tegjeıin bilgen reseılik áripteske rızamyz. 48 adamnyń qutqarýshysy 37 jastaǵy grek-rım kúresi boıynsha balalar jattyqtyrýshysy Erjan Omarhanov sol túngi oqıǵany bylaısha eske alypty: «Tútinniń ıisin sezip, qalyń uıqydan shyrt oıanyp kettim. Júrgizýshige «Esikti ash! Órtenip jatyrmyz!» dep aıqaıladym. Eshkim ún qatar emes. Olardy oıatý úshin urýǵa májbúr boldym. Sosyn esikti tebe bastadym. Sol kezde avtobýs qozǵalysyn toqtatty. Birinshi kezekte kishkentaı balalardy qutqardym. Avtobýs júrgizýshi eshqandaı kómek kórsetpedi. Shoshynǵannan sileıip qatyp qaldy».
Ózimen birge qujaty, temir tulpar satyp alýǵa jınaǵan qarajaty bolǵan Erjan bárinen aıyrylypty, qysqasy. Qazir túgi joq. «Tipti basymdaǵy kepkam da órtenip ketti. Avtobýstaǵy adamdar «saǵan aqsha jınap, kómekteseıik» dedi. Biraq men kómekten bas tarttym. Endi qujattarymdy qaıta qalypqa keltirý úshin biraz júgireıin dep turmyn. Al, aqshama keletin bolsaq, ol aqsha mende bolǵanyn áli dáleldeýim qajet eken» dep qynjylypty.
12 balany, 36 eresek adamdy ólimnen qutqarǵan Erjan Omarhanovtyń jaǵdaıy, mine, osyndaı. Órtenip ketken avtobýs Reseıdiki. Tasymaldaýshy – novosibirlikter. Tasymaldaýshy kompanıa óz qateligin moıyndap, japa shekken jolaýshylarǵa kómek qolyn nege sozbaıdy degen zańdy suraq týyndaıdy. Ózge elde ultannyń kúıin keship júrgen otandasymyz elge aman-esen oralady dep úmittenemiz. Reseıdegi Qazaq elshiligi de atalmysh jaǵdaıǵa aralasyp, belsendilik tanytady degen senimdemiz.
