Biz tólemin aı saıyn ýaqtyly tólep elektr jaryǵyn tutynyp otyrǵan qarapaıym tutynýshylardyń birimiz. Árkim óz isiniń mamany, alaıda úıge sáýle berip jatqan jaryq qondyrǵylarynyń qyzmetin bile bermeıtinimizdi moıyndaımyz. Sondyqtan da jaryq sónip qalsa, sabyrmen qarańǵyda otyra beretin qazaqpyz. 3 kún jaryq bolmasa da, kelgen tólemaqyny 30 kúnge túgendep tóleı beremiz. Sebebi, jaryq jetkizýge mindetti mekemege baryp, ádilin aıtyp, aqyńdy ajyratyp alý múmkin emes.
Mine, kúni keshe úıdegi elektr aqaýlarynyń birinen kákir shyǵyp, 3 kún boıy úıde jaryq bolmaı qaldy. Óz betimizshe jóndeı almaımyz. Ómir qymbat! Sosyn táýekelge bel býyp, mańdaıshasyna «Ońtústik Qazaqstan oblysy (?) «Ońtústik jaryq tranzıt» JSHS Túrkistan elektr júıeleri» dep jazylǵan mekeme esigin qaqtyq. Sharýamyzdy aıta bastaǵannan-aq sózimizdi selqos tyńdaǵan mamandardyń biri: «Sizge biz kómektese almaımyz, elektrıkti kósheden ózińiz taýyp alyp, jóndete berińiz» dedi. «Sonda qalaı, - dedik biz de ań-tań qalyp, - tólemaqyny sizderge tólep júrmiz ǵoı, qyzmetti sizder kórsetpeısizder me sonda?». «Biz úıińizdiń eseptegishine deıingi aralyqqa ǵana jaýap beremiz. Ar jaǵy ózińizdiń problemańyz!». Áńgime osymen bitti. Amal joq, sol mekemeniń ózinen bir monterdi jaldap, «áke-kóke» dep arqasynan qaǵyp, aqshasyn tólep, úıge aparyp jóndetip alýǵa májbúr boldyq.
Sonda deımin de, ploskogýbsyıyn qaıshylap, «tólemaqyńdy ýaqtyly tólemeseń jaryǵyńdy qyrqamyn!» dep qaqpa aldynan shyqpaı, úrkitip-qorqytatyn dardaı mekemeniń qyzmettik nusqaýynda qarapaıym halyqtyń ájetin shyǵarý qyzmetiniń qarastyrylmaǵany ma? Onda aqshany kimge jáne ne úshin tólep júrmiz? Aıyna bir márte esikke ákelip qystyryp ketetin tólemaqy túbirtegin tasyǵany úshin be?

Bekjigit Serdaly