Buǵan deıin Óskemendegi «Vostochnık-3» baýbaqsha qoǵamdastyǵyna qarasty saıajaıdaǵy qazaq tiline qatysty jaǵdaıdy jazǵan edik. Qazaq tilinde aqparat taratyp, jınalysty, is-qaǵazdardy qazaq tilinde júrgizýden bas tartyp otyrǵan qoǵamdastyq basshysy Shýshannıkov G.P-ge habarlasqan edik.

Shýshannıkov G.P qazaq tili týraly másele qoǵamdastyq jınalysynda qaralyp, aýdarmashyǵa qarjy bólinbeıdi degen sheshimge kelgenin aıtady. Qamshy.kz aqparat agenttigi tegin aýdarma jasaıtyn aýdarmashy tabýdy óz moınyna aldy. Kóp uzamaı, Óskemendegi saıajaıda máselemen tanysqan Darhan Amantaıuly esimdi kásibı aýdarmashy tegin aýdarma jasap berýge daıyn ekenin aıtyp, redaksıamyzǵa habarlasqan edi. Ózi Qostanaıda turady. Qazaq tiliniń kósegesin kóterilýine óz úlesin qosý úshin habarlasqan azamatqa rıza boldyq. Alaıda kóp uzamaı qýanyshymyz sý sepkendeı basyldy. Sebebi Shýshannıkov tegin aýdarma jasaıtyn kásibı aýdarmashy tapqanymyzdy, oǵan elektrondy túrde aýdaratyn qaǵazdardy jiberip turý ǵana kerek ekenin aıtyp edik, Shýshannıkov shoshyp tústi.

Internet joq ekenin jáne qaǵazdardy aýdarmaǵa jiberip otyrý onyń quzyretine jatpaıtynyn aıtyp endi basqasha saırady. Sondaǵy tapqan syltaýy – ınternet joq eken, mys.

Qoǵamdastyq QR Til týraly zańyn tolyq oryndaýy úshin olarǵa tegin aýdarma jumysymen aınalysatyn aýdarmashy jaldap, ınternetpen qamtamasyz etip, aýdarmashyǵa qujattardy jiberip otyratyn hatshy taýyp, onyń jalaqysyn aı saıyn tólep otyrý kerek pe sonda?

Zańnyń aty zań. Zańǵa moıynsyný árbir azamattyń mindeti emes pe?! Qarjynyń joqtyǵy ózgelerdi tolǵandyrmaýy qajet. Qarapaıym ǵana mysal, halyq zań boıynsha komýnaldy qyzmettiń aqysyn tóleý kerek. Ony tólemese sýsyz, jaryqsyz qaldyrady. Turǵynnyń aqshasy bar ma, joq pa eshkimdi qyzyqtyrmaıdy. Tóleý kerek pe, kerek. Bul da sol sekildi dúnıe emes pe?