Aqtóbede erekshe toı boldy. İ top múgedekteri Erǵulan Shamshat pen Zıbagúl Ábenovamen otaý qurdy, dep habarlaıdy QazAqparat.

Aqtóbe qalasynyń turǵyny Erǵulan Shamshat 49 jasynda otbasyn qurdy. Arbaǵa tańylǵan İ top múgedegi súıiktisin Túrkistan oblysynan tapty. Ekeýi áleýmettik jelide tanysyp, 2 jyl boıy syrlasyp, bir-birin jaqyn tanyǵan soń úılenýge sheshim qabyldaǵan.

«Áleýmettik jelide múgedek adamdardyń arnaıy toby bar. Ekeýmiz sol top ishinde tanysyp, sóılesip kettik. Bir aı buryn baryp, áıelimniń týystarymen, baýyrlarymen tanystym. Keıin qyz uzatý toıy boldy, bizge bári batasyn berdi. Ony alǵash kórgennen-aq, keýdeni saǵynysh kernedi»,- dedi Erǵulan Shamshat.

İ top múgedegi arbamen, keıde baldaqpen qozǵalady. Osydan 20 jyl buryn poıyzda bolǵan tótenshe jaǵdaıdan soń omyrtqasyna zaqym kelip, eki aıaǵy qozǵalmaı qaldy. Qazirgi ýaqytta qaladaǵy qoǵamdyq jumystarǵa aralasyp, mádenı-tanymdyq sharalarǵa qatysady.

«Otaǵasy 1981 jyly qaıtys bolyp, bes balamdy baqtym. Uldyń úlkeni Erǵulan jumys istep júrgende poıyzdan qulap, mertigip qaldy. 2000 jyldan beri arbaǵa tańyldy. Qazir múgedek ulymmen birge páter jaldap turamyn. Birinshi qabatta bolǵanymen, baspaldaqpen eńbekten júrip, úıge kiredi. Bireýmizdiń aqshamyzdy páterge tóleımiz, bireýmiz azyq-túlikke jumsaımyz»,- dedi Erǵulan Shamshattyń anasy Gúlshat Muǵalova.

Shamshat áýleti 2005 jyly Qaraqalpaqstannan Aqtóbe oblysyna qonys aýdardy. Aldymen Alǵa aýdany, Tamdy aýylyna qonystanyp, keıin Aqtóbe qalasyna ornyqty.

«Ulym úılenemin degen kezde qýanyp, batamdy berdim. Qazir jasym 80-de. Úı jumysy maǵan da qıyn»,- dedi anasy.

Erǵulan Shamshat Túrkistan oblysynyń týmasy Zıbagúl Ábenovamen otaý qurdy. Toıda betashar jasalyp, qonaqtar kelin qolynan shaı ishti.

«Biz tanysyp, telefon arqyly sóılesip júrdik. Keıin jolyǵyp, óziniń sezimin, otaý qurý týraly usynysyn aıtty. Birden kelisim berdim. Ári «meni de súıetin adam bar eken» degen oı keldi. Baqyttymyn... Alǵashynda Aqtóbege, alysqa kelý qorqynyshty boldy. Biraq qıyndyqty ekeýmiz birge jeńemiz»,- dedi Zıbagúl Ábenova.

Ol jasóspirim shaǵynda tumaýmen aýyryp, asqynǵan kezde eki aıaǵynan júre almaı qalǵan.

 «Jyl saıyn saýyqtyrý sharalarynan ótip, baldaqpen júrýge múmkindik aldym. Qazir úı ishinshe qabyrǵaǵa súıenip qozǵalamyn», -deıdi Zıbagúl.

Zıbagúl - ismer, qolóner sheberi. Endi ol kóp ýaqytyn kórpe tigip, monshaqpen túrli buıym jasaýǵa arnamaq.

Endi shańyraq kótergen Shamshat áýleti turaqty baspanaly bolyp, bir-birine súıeý bolýdy armandaıdy.