Osy kúnderi «Medıker» kompanıasy Jańaózen qalasynyń «Munaıshy»  Medısınalyq-profılaktıkalyq ortalyǵynda  jyljymaly keńes berý jumysyn júrgizip jatyr. Aqpannyń 20-nan naýryzdyń 1-ne deıin jalǵasatyn sharanyń maqsaty «Ózenmunaıgaz» AQ qyzmetkerleri men olardyń januıalaryna kásibı medısınalyq járdem kórsetip, keńes berý. Eń bastysy - qabyldaý tegin. Atalǵan ýaqyt aralyǵynda ortalyqta Astana men Qazaqstannyń ózge de qalalarynan kelgen joǵary sanatty mamandarmen medısına ǵylymdarynyń kandıdattar qabyldaý júrgizedi. Olardyń arasynda asa qajetti mamandar – oftalmolog, otorınolarıngolog, pedıatr jáne taǵy basqalary bar.

«Medıker» kompanıasy qolǵa alyp jatqan osy bastamasy arqyly aýmaqtyń áleýmettik jaǵdaıyn jaqsartýǵa úles qospaq. Óıtkeni, ózge mamandyq ıelerine qaraǵanda atqaratyn jumysy aýyr bolyp keletin munaıshylardyń densaýlyǵyn baqylap, olarǵa barynsha kómek kórsetýdiń qanshalyqty mańyzdy ekenin kompanıa jaqsy túsinedi. «Medıker» - munaı kompanıasy ókilderin medısınalyq turǵydan óz qamqorlyǵyna alyp otyrǵandyqtan, iske asyp jatqan sharalardyń tıgizer paıdasy da zor ekenine senimdi.

 Ótken aıda Jańaózenge is-saparǵa baryp kelgen dárigerler toby, qabyldaý ótip jatqan «Munaıshy» medısınalyq ortalyǵy qala ortalyǵynan shalǵaı jatqandyqtan, kóligi joq naýqastar úshin emhanaǵa jetý qıynǵa soǵyp júrgenin aıtqan edi.

Shaǵymdy eskergen «Medıker» kompanıasy jedel túrde jergilikti ákimshilikpen kelisimge kelip, ortalyqqa únemi qatynap turatyn jolaýshylar avtobýsyn iske qosý jóninde ortaq uıǵarymǵa qol jetkizdi. Bul da medısınalyq kompanıanyń óz qolastyndaǵy naýqastarǵa kórsetip otyrǵan qamqorlyǵynyń bir kórinisi. «Medıker» medısınalyq kompanıasynyń jyljymaly keńes berý jumysy jaıly «Ózenmunaıgaz» AQ qyzmetkerlerine aldyn-ala málimet berilgendikten jarnamadan qulaqdar bolǵan munaıshylar joǵary dárejeli dárigerlerdiń qabyldaýyna aldyn-ala jazylyp ta qoıdy. Sondyqtan qabyldaý bastalǵaly beri «Medıker» dárigerleriniń jumysy qyzý. Qyzmet kórsetý ýaqyty da tańerteńnen qas qaraıǵanǵa deıin jalǵasyp jatyr. Alaıda, kompanıadan habarlasqan tilshige qarbalas jumysy kezinde birer sátin bólip, aýqymdy sharanyń barysy jaıly bir-eki aýyz pikirin bildirgen «Medıker» dárigerler bylaı deıdi:

Ábisheva Laýra Sákenqyzy, terapevt (Astana qalasy):

- Qabyldaýǵa kelip jatqan naýqastar bizge rıza. Biz de olarǵa qoldan kelgen kómegimizdi kórsetip, aıanbaı qyzmet etip jatyrmyz. Kúnine aldymyzdan ótetin adam kóp bolǵanymen, qybaldaý óte sapaly ári qalypty túrde júrgiziledi. Bul da qýantarlyq jaıt. Alaıda jumys barysynda aımaqta revmatolog, gastroendokrınolog, kardılog jáne taǵy basqa mamandardyń óte az ekeni birden seziledi. Naýqastardy arnaıy tekserýden ótkizý úshin eń qajetti qural-jabdyqtar da joqtyń qasy.

 Mamandardyń aıtýynsha, qabyldaýǵa kelip jatqan naýqastardyń kóbiniń densaýlyǵyn kútýge jaǵdaılary joq. Maman tapshylyǵy óz aldyna, oǵan aımaqtaǵy ekologıalyq ahýaldyń qıyndyǵy da qosylyp otyr. Osy oraıda Jańaózende aýyz sýmen qamtamasyz etý máselesi de ótkir turǵany barshaǵa málim. Aıtylǵan olqylyqtardyń ornyn toltyrý úshin «Medıker» qoldan kelgenshe járdem kórsetýge qashanda ázir. Oǵan osy kúnderi «Munaıshy»  Medısınalyq-profılaktıkalyq ortalyǵynda ótip jatqan shara dálel bolmaq.

Saǵdıeva Sáýle Jaqsylyqqyzy, joǵary sanatty dáriger, pedıatr (Astana qalasy):

-  Bizdiń kelip, jumys istep jatqanymyz tek naýqastar úshin emes, jergilikti dárigerler úshin de óte paıdaly boldy. Biz osy jerde jumys istep jatqan mamandarǵa oqyǵan-toqyǵan, bilgenimizdi aıtyp, tájirıbemizben de bólisip jatyrmyz. Sondyqtan, «Medıker» kompanıasy muryndyq bolǵan bul sharanyń jaǵymdy ári tıimdi tustary óte kóp.

«Medıker» kompanıasy osy ispettes dástúrli sharalardy odan ári júrgizýge nıetti. Qańtar aıynda Jańaózenge baryp, qabyldaý júrgizgen dárigerler jergilikti ákimshiliktiń ótinishimen kompanıanyń saqtandyrý júıesine enbeıtin turǵyndardy da qarap, keńes berýge kelisimin berdi. Nátıjesinde, Jańaózende ótkizgen bir apta ýaqyt ishinde dárigerler brıgadasy 700-ge jýyq naýqasty qabyldady. Kóktem qarsańynda qyzmet etip keletin dárigerlerdiń jumysyn baqylap, jobanyń kem-ketik tustaryn anyqtaý úshin naýqastarǵa arnaıy saýalnama paraqshalary taratylyp jatyr. Onda «Medıker» dárigerleriniń qyzmet kórsetý sapasy, jobany damytyp, nátıjesin odan ári jaqsartýǵa qandaı usynys bar ekeni jaıly suraqtar bar. «Medıker» kompanıasy aldaǵy ýaqytta saýalnama qorytyndysyna súıene otyryp, «Ózenmunaıgaz» AQ qyzmetkerlerine kórsetiletin medısınalyq qyzmet kórsetý deńgeıin odan da joǵarylatýdy kózdep otyr.

 Aısamal Ábilhan